З 18 мая ў музеі кнігі Нацыянальнай бібліятэкі Беларусі арганізавана “Выстаўка адной кнігі”, прымеркаваная да Міжнароднага дня музеяў.
Выстаўка прысвечана найбольш вядомаму твору чалавека, які яшчэ ў ХІХ ст. прыдумаў падводную лодку, касмічны карабель, саманаводную зброю, акваланг, тэлебачанне і самалёт, прымусіў рухацца цэлы востраў і нават амаль зрушыў зямную вось! Няцяжка здагадацца, што размова ідзе пра Жуля Верна.
У 2013 г. спаўняецца 185 гадоў з дня нараджэння французскага пісьменніка, географа, класіка прыгодніцкай літаратуры, аднаго з заснавальнікаў жанру навуковай фантастыкі, а яго раману “Дзеці капітана Гранта” – 145 гадоў.
На выстаўцы ў музеі кнігі дэманструецца першае аб’яднанае ілюстраванае выданне папулярнага рамана “Дзеці капітана Гранта. Падарожжа вакол свету” (“Les Enfants du capitaine Grant. Voyage autour du Monde”) 1868 г. са 172 выдатнымі гравюрамі Э. Панэмакера па малюнках французскага жывапісца Э. Рыу.
Прадстаўлены адзін з першых перакладаў твора на беларускую мову Г. Кутылоўскага (“Дзеці капітана Гранта”, Менск, 1938), лепшыя пераклады рамана на рускую мову І. Пятрова (“Дети капитана Гранта”, Масква – Ленінград, 1936) і А. Бекетавай (“Дети капитана Гранта”, Масква – Ленінград, 1949), пераклад на ўкраінскую – Т. Варановіч (“Діти капітана Гранта”, Кіеў, 1967).
Экспануецца экзэмпляр парыжскага выдання Жуля Верна “З Зямлі на Луну за 97 гадзін” (“De la Terre a la Lune : trajet direct en 97 heures”,1880) з аўтографам аўтара.
Запрашаем усіх жадаючых наведаць выстаўку.
Кантактны тэлефон: (8 017) 293 25 85.
 |
 |
 |
 |
 |
