З 16 чэрвеня да 30 верасня да 10-годдзя новага будынка бібліятэкі ў кальцавым калідоры 3-га паверха арганізавана кніжна-дакументальная выстаўка “Выдавецкія праекты Нацыянальнай бібліятэкі Беларусі. 2006–2016”.
Цэнтрам экспазіцыі сталі праекты і ініцыятывы бібліятэкі па захаванні кніжнай спадчыны Беларусі – факсімільныя выданні “Слуцкае Евангелле” (2009), “В. Ластоўскі. Гісторыя беларускай (крыўскай) кнігі” (2012), “Житие Евфросинии Полоцкой” (2012), “Буквар мовы славянскай” (2012), "Калядная пісанка. 1913" (2012), “Баркалабаўскі летапіс” (2013), “Симеон Полоцкий. Жезл правления” (2013), “Тураўскае Евангелле” (2014), “Кніжная спадчына Францыска Скарыны” (2014– ).
З фондаў бібліятэкі былі алічбаваны і ўзноўлены прыжыццёвыя кнігі класікаў беларускай літаратуры: “Dudka Białaruskaja Macieja Buraczka. – Krakow, 1891” Францішка Багушэвіча (2009), “Вянок. – Вільня, 1913” Максіма Багдановіча (2011), “Сымон Музыка. – Менск, 1925” Янкі Купалы (2012) і “Шляхам жыцця. Пецярбург, 1913” Якуба Коласа (2012).
Некалькі соцень кніжных помнікаў з фонду Нацыянальнай бібліятэкі Беларусі, сярод якіх унікальныя рукапісы, каштоўныя старадрукаваныя і рэдкія кнігі, а таксама картаграфічныя выданні, адлюстраваны ў альбоме “Кніжная спадчына Беларусі” (2014).
Акрамя факсімільных выданняў, на выстаўцы прадстаўлены даведачныя, інфармацыйныя, навуковыя, вытворча-практычныя, перыядычныя і выданні з працягам, падрыхтаваныя супрацоўнікамі Нацыянальнай бібліятэкі. Тэматыка іх даследаванняў шырокая і шматаспектная – ад беларускай кніжнай спадчыны да сучасных бібліятэчна-інфармацыйных тэхналогій.
Важным вынікам навукова-даследчай дзейнасці супрацоўнікаў бібліятэкі стаў выпуск электронных рэсурсаў, накіраваных на захаванне і папулярызацыю нацыянальнай гісторыка-культурнай спадчыны, прыцягненне ўвагі да беларускай кнігі, павелічэнне цікавасці грамадства да лепшых узораў айчыннай літаратуры, знамянальных гістарычных падзей, а таксама славутых імён нашай краіны.
Цікавым напрамкам выдавецкай дзейнасці па раскрыцці і папулярызацыі бібліятэчных фондаў з’яўляецца выпуск камплектаў паштовак з узнаўленнем ілюстрацый з манускрыптаў, старадрукаваных і рэдкіх выданняў, а таксама тэматычных віншавальных і краязнаўчых паштовак пачатку ХХ стагоддзя.
Выдавецкія праекты Нацыянальнай бібліятэкі Беларусі неаднаразова былі ўдастоены ўзнагарод на міжнародных і нацыянальных конкурсах “Мастацтва кнігі”.
Выстаўка будзе цікавай кнігазнаўцам, гісторыкам і шырокаму кругу кнігалюбаў.
Тэлефон для даведак: (8 017) 293 29 80.
|
|
|
|
|
|
|
|
|
|
|
