Першы прамень сонца слізгае па падушцы, світанак дражніць водарам яблычнага пірага і сырадою, а ў раскрытую фортку разам са свежым ветрыкам уплывае шум садовых дрэў. Сардэчна запрашаем у сельскую сядзібу! Пакінуўшы пыльны горад з яго вечнай спешкай, тут кожны зможа здабыць супакой, аднавіць душэўную раўнавагу і набрацца сіл.
З 19 мая па 19 ліпеня ў зале беларускай літаратуры (пам. 205) праходзіць кніжная выстава “Вяртанне да вытокаў: аграэкатурызм у Беларусі”.
Сёння аграэкатурызм – гэта адзін з напрамкаў турыстычнага рынку краіны, які развіваецца вельмі хутка. Гэта цудоўная магчымасць для жыхароў буйных гарадоў і замежных турыстаў атрымаць паўнавартасны адпачынак у экалагічна чыстых кутках нашай рэспублікі, а таксама атрымаць асалоду ад яе маляўнічых краявідаў.
Шматлікія маляўнічыя каталогі пазнаёмяць наведвальнікаў выставы з паслугамі сельскіх сядзіб у розных рэгіёнах нашай краіны.
Матэрыялы экспазіцыі раскажуць пра тое, што такое аграэкатурызм, якія перадумовы яго ўзнікнення, стан на сённяшні дзень, формы арганізацыі аграэкатурызму, а таксама дапамогуць разгледзець дадзенае паняцце у ракурсе прыватнага прадпрымальніцтва.
Дапаўняюць выставу публікацыі аб праблемах і перспектывах развіцця аграэкатурызму ў Беларусі, інавацыйных кірунках яго развіцця.
Усяго ў экспазіцыі прадстаўлена больш за 120 дакументаў.
Спіс літаратуры
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
