З 10 лістапада па 18 снежня ў зале выяўленчых і відэадакументаў (пам. 307) праходзіць выстаўка “Вялікі сатырык”, прысвечаная 315-годдзю з дня нараджэння англійскага мастака Уільяма Хогарта.
Росквіт нацыянальнай школы жывапісу ў Англіі пачынаецца з жывапісца, графіка, тэарэтыка мастацтва Уільяма Хогарта (1697–1764), у асобе якога англійскае мастацтва зблізілася з перадавой англійскай літаратурай і тэатрам першай паловы XVIII ст.
У. Хогарт – стваральнік асобага роду сатырычнага жанравага жывапісу. Мастак адлюстроўвае сучаснае жыццё таго часу і робіць прадметам сатыры ўсе адмоўныя яго бакі: распушчанасць нораваў, прадажнасць суда і г. д.
На выстаўцы прадстаўлены серыі работ, багатых на камічныя падрабязнасці: – “Модны шлюб”, “Гісторыя распусніка” і інш. Гэтыя творы ўяўляюць сабой набор тэатральных сцэн, дзе персанажы разыгрываюць складзеную мастаком п’есу.
На працягу ўсяго творчага жыцця жывапісец звяртаўся да партрэта. Цэнтральнае месца ў экспазіцыі займаюць рэпрадукцыі яго знакамітых работ “Дзяўчына з крэветкамі”, “Дзеці Грэм”, “Партрэт Мэры Эдвардс” і інш.
У. Хогарт быў не проста мастаком, які ствараў камічныя вобразы. Ён таксама быў тэарэтыкам мастацтва, які выказаў свае эстэтычныя погляды ў трактаце “Аналіз прыгажосці”, прадстаўленым на выстаўцы.
У ліку экспанатаў – рэпрадукцыі карцін паслядоўнікаў У. Хогарта, мастакоў Д. Рэйнальдса, Т. Гейнсбара і іншых, якія дазваляюць найбольш поўна раскрыць тэму развіцця англійскага жывапісу XVIII ст.
Мастацтва Хогарта, бясспрэчна, больш значнае, чым гэта ўяўлялі сабе сучаснікі, і мы толькі цяпер пачынаем усведамляць усю глыбіню і смеласць яго пошукаў.
На выстаўцы прадстаўлена звыш 80 дакументаў: кнігі, часопісы, паштоўкі і рэпрадукцыі карцін мастака.
Кантактны тэлефон: 8 (017) 293 27 58.