З 15 ліпеня па 29 жніўня ў зале выяўленчых і відэадакументаў (пам. 307) праходзіць выстаўка "Вялікі галандзец", прысвечаная 405-годдзю з дня нараджэння галандскага жывапісца і афартыста Харменса ван Рэйна Рэмбранта (1606−1669).
Творчасць аднаго з найбуйнейшых прадстаўнікоў галандскага барока, прасякнутая імкненнем да глыбокага філасофскага разумення жыцця, унутранага свету чалавека з усім багаццем яго душэўных перажыванняў, азначае сабой вяршыню развіцця галандскага мастацтва XVII ст., аднаго з пікаў сусветнай мастацкай культуры. Мастацкая спадчына Рэмбранта адрозніваецца выключнай разнастатнасцю: ён пісаў партрэты, нацюрморты, пейзажы, жанравыя сцэны, карціны на гістарычныя, біблейскія, міфалагічныя тэмы, быў непераўзыдзеным майстрам малюнка і афорта.
Яркім увасабленнем эстэтычных поглядаў мастака стала манументальная кампазіцыя "Даная" (1636), у якой ён нібы ўступае ў палеміку з вялікімі майстрамі Адраджэння: ідэальнай прыгажосці вобразаў італьянскіх жывапісцаў супрацьпастаўляе прыгажосць духоўнасці і цеплыні інтымнага чалавечага пачуцця.
1640−1650-я гг., напоўненыя для Рэмбранта цяжкімі жыццёвымі выпрабаваннямі, адкрываюць перыяд яго творчай сталасці. Ён піша спакойныя, поўныя цеплыні і інтымнасці біблейскія і жанравыя сцэны, раскрываючы тонкія адценні чалавечых перажыванняў. Усё часцей звяртаецца да жанру партрэта, адлюстроўваючы найбольш блізкіх яму людзей. Стыхіі святла і колеру, незалежныя і крыху процілеглыя ў ранніх працах мастака, цяпер зліваюцца ў адзінае ўзаемазвязанае цэлае.
У апошні год жыцця Рэмбрант стварыў свой галоўны шэдэўр – манументальнае палатно "Вяртанне блуднага сына" (к. 1668−1669), якое ўвасобіла ўсю мастацкую і маральна-этычную праблематыку позняй творчасці мастака.
На выстаўцы прадстаўлена 120 дакументаў. Гэта кнігі, часопісы, паштоўкі і рэпрадукцыі, прысвечаныя вялікаму галандскаму мастаку.
Экспазіцыя разлічаная на ўсе катэгорыі чытачоў, якія цікавяцца творчасцю Рэмбранта.
Кантактны тэлефон: 293-27-58.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
