З 1 кастрычніка па 29 лістапада ў зале нотных і аўдыядакументаў (пам. 305) праходзіць выстаўка “Вобраз духоўнай спадчыны”, прысвечаная творчасці беларускага кампазітара, педагога А.Ю. Мдзівані.
Заслужаны дзеяч мастацтваў Беларусі (1982), лаўрэат Дзяржаўных прэмій Беларусі (1988, 1996), прафесар (1993) Андрэй Юр’евіч Мдзівані нарадзіўся ў горадзе Тбілісі, скончыў Беларускую дзяржаўную кансерваторыю па класе кампазіцыі і на сённяшні дзень з’яўляецца найбуйнейшым прадстаўніком беларускай кампазітарскай школы мяжы XX–XXI стагоддзяў. Яго творчасць характарызуецца сінтэзам найважнейшых тэм гісторыі і сучаснасці, адлюстраваннем нацыянальнай праблематыкі, а таксама ўвасабленнем філасофскіх ідэй і канцэпцый.
Найбольш яркай асаблівасцю музыкі А. Мдзівані з’яўляецца эмацыянальнасць у злучэнні з рэльефнай вобразнасцю і прыгажосцю музычнага інтаніравання. У творах кампазітара прысутнічае свой непаўторны каларыт – вынік своеасаблівага сінтэзу ўсходняй і славянскай інтанацый.
Творчая спадчына кампазітара ахоплівае велізарны жанравы дыяпазон: гэта сцэнічныя творы (опера, балет, музычная камедыя), сімфанічная музыка (сімфоніі, сімфанічныя паэмы і карціны), камерна-інструментальныя, вакальна-інструментальныя і харавыя творы, песні і прыкладная музыка.
На выстаўцы прадстаўлены даведачныя выданні, кнігі і артыкулы, прысвечаныя Андрэю Юр’евічу, а таксама нотныя выданні твораў кампазітара. Сярод іх – сімфанічная паэма “Фрески “ (1967), п’еса “Остинато” (1974), сімфанічная паэма “Диалект” (1974), сімфонія № 6 “Полоцкие письмена” (1987), балет “Страсти “ (“Рогнеда”, паст. 1995), вакальныя творы і інш. Частка з іх прадстаўлена на аўдыядакументах у выкананні вядучых музыкантаў.
Кантактны тэлефон: (8 017) 293 27 53.