З 3 па 20 лістапада ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка “Вернасць высакародным ідэалам”, прысвечаная 65-годдзю з дня ўступлення ў сілу Статута ЮНЕСКА.
Арганізацыя Аб’яднаных Нацый па пытаннях адукацыі, навукі і культуры (ЮНЕСКА) была заснавана на Лонданскай канферэнцыі 6 лістапада 1945 г. Статут арганізацыі ўступіў у сілу 4 лістапада 1946 г. пасля ратыфікацыі дваццаццю дзяржавамі. У снежні 1946 г. ЮНЕСКА атрымала статут спецыялізаванай установы ААН. На сённяшні момант у арганізацыі налічваецца 193 краіны. У склад арганізацыі ўваходзіць 67 бюро і падраздзяленняў, размешчаных у розных частках свету. Штаб-кватэра арганізацыі размяшчаецца ў Парыжы, у Францыі.
Асноўная мэта ЮНЕСКА – садзейнічанне ўмацаванню міру і бяспекі шляхам пашырэння супрацоўніцтва народаў у галіне адукацыі, навукі і культуры ў інтарэсах забеспячэння ўсеагульнай павагі, справядлівасці, захавання законнасці і праў чалавека, а таксама асноўных свабод, абвешчаных у Статуце Арганізацыі Аб’яднаных Нацый, для ўсіх народаў, без адрознення расы, пола, мовы або рэлігіі.
З мэтай ажыццяўлення свайго мандата ЮНЕСКА выконвае пяць асноўных функцый:
- праводзіць перспектыўныя даследаванні формаў адукацыі, навукі, культуры і камунікацыі, неабходных у заўтрашнім свеце;
- праводзіць распаўсюджванне, перадачу і абмен ведамі, абапіраючыся галоўным чынам на навуковыя даследаванні, падрыхтоўку і выкладанне;
- ажыццяўляе нарматыўную дзейнасць: падрыхтоўку і прыняцце міжнародных актаў і абавязковых для выканання рэкамендацый;
- аказвае паслугі экспертаў дзяржавам-членам для вызначэння іх палітыкі ў галіне развіцця і распрацоўкі праектаў у форме тэхнічнага супрацоўніцтва;
- ажыццяўляе абмен спецыялізаванай інфармацыяй.
ЮНЕСКА працуе над стварэннем умоў для дыялогу паміж цывілізацыямі, культурамі і народамі, які базіруецца на павазе агульных каштоўнасцей. У аснове ўсіх стратэгій і мерапрыемстваў ЮНЕСКА ляжаць шырокія Мэты ў галіне развіцця і пэўныя задачы міжнароднай супольнасці. Яны ўзгоднены на міжнародным узроўні і сфармуляваны ў Дэкларацыі тысячагоддзя (МРТ). Дасягненню гэтых мэт спрыяе ўнікальны характар сфер кампетэнцыі ЮНЕСКА, якія ахопліваюць адукацыю, навуку, культуру, камунікацыю і інфармацыю.
Рэспубліка Беларусь з’яўляецца членам Арганізацыі Аб’яднаных нацый па пытаннях адукацыі, навукі і культуры з 1954 г. На працягу многіх гадоў пасля ўступлення Беларусі ў ЮНЕСКА гэта арганізацыя выкарыстоўвалася ў асноўным як трыбуна для распаўсюджвання інфармацыі пра рэспубліку і як адзін з нямногіх каналаў удзелу ў міжнародным жыцці. Пасля набыцця рэальнага суверэнітэту супрацоўніцтва з ЮНЕСКА пачало насіць і практычны характар. Яно адкрывае перад установамі навукі, культуры і адукацыі нашай краіны магчымасці для ўдзелу ў міжнародных інтэлектуальных абменах для прыцягнення міжнароднага вопыту, інфармацыйных матэрыялаў, тэхнічнай і іншай дапамогі.
Прапанаваная тэматычная выстаўка складаецца з наступных раздзелаў:
- Гісторыя стварэння ЮНЕСКА.
- Асноўныя напрамкі дзейнасці ЮНЕСКА у пяці праграмных сектарах:
- адукацыя;
- дакладныя і прыродазнаўчыя навукі;
- сацыяльныя і гуманітарныя навукі;
- культура;
- камунікацыі і інфармацыя.
- ЮНЕСКА і Беларусь.
У экспазіцыі прадстаўлена больш за 100 дакументаў на рускай, англійскай і французскай мовах: кнігі, перыядычныя выданні, мімеаграфаваныя матэрыялы ЮНЕСКА, брашуры, буклеты.
Выстаўка будзе цікавая спецыялістам у галіне міжнародных адносін, сацыёлагам, супрацоўнікам устаноў культуры і мастацтва, студэнтам і выкладчыкам, а таксама ўсім, хто цікавіцца дзейнасцю ЮНЕСКА.
Карысныя спасылкі:
- ЮНЕСКА: што гэта за арганізацыя
- Кіруючыя органы
- Дзяржавы – члены ЮНЕСКА
- Генеральны дырэктар ЮНЕСКА Ірына БОКАВА
- Сакратарыят
- Гісторыя ЮНЕСКА
- Арганізацыя Аб'яднаных Нацый па пытаннях адукацыі, навукі і культуры: гісторыя і сучаснасць (спіс літаратуры)
- Беларусь і ЮНЕСКА (спіс літаратуры)
- Дакументы ЮНЕСКА ў фондах Нацыянальнай бібліятэкі Беларусі