З 10 лютага па 14 сакавіка ў зале беларускай літаратуры (пам. 205) праходзіць выстаўка “Вернасць тэме і героям”, прысвечаная 100-годдзю з дня нараджэння беларускага пісьменніка, тэатральнага крытыка і літаратуразнаўца У.Б. Карпава (1912–1977).
Таленавіты майстар слова, аўтар раманаў, апавяданняў, крытычных артыкулаў, Уладзімір Барысавіч Карпаў унёс значны ўклад у пасляваенную беларускую прозу.
Выстаўка складаецца з трох раздзелаў. Першы – “Летапісец сваёй эпохі” – адкрываецца Зборам твораў у пяці тамах (1983–1985), у якім найбольш поўна прадстаўлена творчая спадчына пісьменніка.
Працягваюць экспазіцыю кнігі “Па шляху сталасці”(1952) і “Крылаты ўзлёт”(1966), дзе Уладзімір Карпаў заявіў пра сябе як пра адметнага крытыка і даследчыка літаратуры. У зборнікі ўвайшлі літаратурна-крытычныя артыкулы пра беларускую прозу і драматургію, у якіх літаратуразнавец аналізуе творчасць Я. Купалы, Я. Коласа, К. Крапівы, К. Чорнага, М. Лынькова і іншых пісьменнікаў.
Знаёмства наведвальнікаў выстаўкі з мастацкімі творамі У. Карпава пачынаецца з першай аповесці пісьменніка “Без нейтральнай паласы” (1950). Прадаўжаюць экспазіцыю раманы, якія ўваходзяць у цыкл “На перавале стагоддзя”: “За годам год” (1957), “Вясеннія ліўні” (1961), “Нямігі крывавыя берагі” (1962), “Сотая маладосць” (1971). Апошняя праца – зборнік апавяданняў і ўспамінаў пра мінскае падполле “Прызнанне ў нянавісці і любві” (1976).
Уладзімір Карпаў з’яўляецца сааўтарам дакументальных кніг і фотаальбомаў “Мы раскажам пра Мінск” (1964), “Мінск” (1965), “Горад і годы” (1965), “Сквозь огонь и смерть” (1970), прадстаўленых на выстаўцы.
Другі раздзел – “З мужнасцю і адвагай у сэрцы” – знаёміць з перакладчыцкай дзейнасцю пісьменніка. Тут жа экспануюцца яго творы, перакладзеныя на рускую, украінскую, англійскую, балгарскую і іншыя мовы.
У раздзеле “І жыццём, і творчасцю” прадстаўлены публікацыі пра творчасць У. Карпава, змешчаныя ў энцыклапедычных выданнях, кнігах і часопісах.
Экспазіцыя, ілюстраваная фотаздымкамі, налічвае больш за 100 адзінак дакументаў.
Кантактны тэлефон: 293-27-16.
 |
 |
 |
 |
 |
 |
