З 25 студзеня па 14 лютага ў зале выяўленчых і відэадакументаў (пам. 307) арганізавана выстаўка “Веліч рускага пейзажа”, прысвечаная 180-годдзю з дня нараджэння рускага жывапісца, афартыста, акварэліста, пейзажыста І.І. Шышкіна (1832–1898).
“Наўрад ці ўступае які іншы народ ў гісторыю з такім багатым іглічным футрам на плячах”, – гэтыя словы пісьменніка Л. Лявонава абсалютна дакладныя і быццам сказаны пра сапраўды рускага мастака-вяціча Івана Іванавіча Шышкіна.
Рускі лес дачакаўся свайго мастака. Нават прозвішча ў яго лясное – Шышкін. Ён выйшаў на арэну сусветнага мастацтва з густых прыкамскіх лясоў. У ялабужскім лесе знайшоў прыгажосць, пра якую расказаў свету. Набыў рэдкае майстэрства – уменне перанесці рускі лес на карціну, ды так, што маленькая травінка на палатне бачная і водарам ігліцы і кветак патыхае. “Царом лясоў” называлі мастака сучаснікі, кожны раз захапляючыся тым, што ён “лясішча звалок цалкам з натуры” ды і ўставіў яго ў карціну. Творчасць мастака – энцыклапедыя гераічнага і эпічнага рускага пейзажа.
На выстаўцы прадстаўлена звыш 120 дакументаў. Гэта альбомы, паштоўкі, календары, якія раскрываюць творчасць вядомага мастака. Сярод экспанатаў – рэпрадукцыі яго палотнаў “Дубовы гай”, “Жыта”, “Лясныя далячыні”, “Среди долины ровныя…” і многіх іншых, у якіх руская прырода паказана ва ўсёй яе эпічнай сіле, магутнасці і прыгажосці.
Дапаўняюць экспазіцыю перапіска і дзённікі мастака, мемуары пра І. Шышкіна яго сяброў-перадзвіжнікаў І. Рэпіна, І. Крамскога, В. Пярова.
У ліку экспанатаў – рэдкія выданні, ілюстраваныя І. Шышкіным: “Беседы о русском лесе” (1885, 1899, 1903) Д.Н. Кайгародава і “Истоки Волги” (1893) Я.П. Вішнякова.
Экспазіцыя разлічана на ўсе катэгорыі чытачоў.
Кантактны тэлефон: 293-27-58.