З 1 па 28 лютага ў зале беларускай літаратуры (пам. 205) праходзіць выстаўка “Важкасць слова”, прысвечаная 70-годдзю беларускага літаратуразнаўца, крытыка, пісьменніка Міхася Тычыны.
Імя вучонага, доктара філалагічных навук Міхаіла Аляксандравіча Тычыны добра вядома не толькі ў нашай рэспубліцы, але і за яе межамі. Больш за чатыры дзесяцігоддзі ён нястомна прымнажае набыткі беларускага літаратуразнаўства і крытыкі, даследуе праблемы літаратурных узаемасувязей.
Плёнам шматгадовай даследчыцкай і выкладчыцкай працы пісьменніка сталі кнігі, якія экспануюцца ў раздзеле “Даследчык прозы”. Сярод іх – манаграфіі “Кузьма Чорны: эвалюцыя мастацкага мыслення” (1973, 2004), “Народ і вайна” (1985), “Карані і крона: фальклор і літаратура” (1991, 2002), “Аляксандр Пушкін і Якуб Колас” (1999), “Янка Купала і Якуб Колас: учора і сёння” (2012), зборнікі літаратурна-крытычных артыкулаў “Змена квадры” (1983), “Час прозы” (1988), зборнік літаратурна-дакументальных матэрыялаў пра беларускі і ўкраінскі род Тычынаў “Вялікія і Малыя Тычыны: легенды і рэальнасць” (2011).
Адметнае месца на выстаўцы займаюць працы літаратуразнаўчага характару, напісаныя ў суаўтарстве з В. Жураўлёвым, Л. Баршчэўскім, П. Васючэнкам і іншымі даследчыкамі беларускай літаратуры.
Раздзел “Грані майстэрства” змяшчае падручнікі і мнагатомныя даследаванні па беларускай літаратуры, выданні па беларуска-рускіх, беларуска-ўкраінскіх літаратурных сувязях, адным з аўтараў якіх з’яўляецца Міхась Тычына. Тут прадстаўлены і шматлікія публікацыі пісьменніка (даклады, выступленні, рэцэнзіі, каментарыі, уступныя артыкулы, пасляслоўі), а таксама яго мастацкія празаічныя і паэтычныя творы, якія змешчаны ў часопісах і калектыўных зборніках.
Наведвальнікі выстаўкі могуць пазнаёміцца з кнігамі аўтабіяграфічных аповесцей і апавяданняў пісьменніка “Дажынкі” (1979, 1981 /на рускай мове/) і “Вяртанне: аповесць пра Кузьму Чорнага” (1984), у якіх адчуваецца неардынарнасць светапогляду аўтара.
Выданні, змешчаныя ў раздзеле “На пульсе сучаснасці”, сведчаць пра навукова-рэдактарскую і перакладчыцкую дзейнасць Міхася Тычыны.
Завяршае экспазіцыю раздзел “Неардынарнасць асобы”, у якім прадстаўлены публікацыі пра жыццё і творчы шлях пісьменніка.
Выстаўка змяшчае больш за 200 дакументаў і багата ілюстравана фотаздымкамі.
Кантактны тэлефон: (8 017) 293 27 16.