З 5 студзеня па 31 сакавіка ў зале прававой інфармацыі (пам. 207b) адкрыта выстаўка “Ваша выбарчае права: 15 гадоў Выбарчаму кодэксу Рэспублікі Беларусь".
Аналіз беларускага выбарчага заканадаўства і практыкі яго ўжывання пасля прыняцця Канстытуцыі ў 1994 г. і асабліва пасля ўнясення змен у Канстытуцыю ў 1996 г. паказвае, што выбарчае заканадаўства Рэспублікі Беларусь у сучасны момант у істотнай ступені ўвабрала ў сябе ўстаноўленыя Канстытуцыяй міжнародныя стандарты адносна прынцыпаў усеагульнага і роўнага выбарчага права пры тайным галасаванні, а таксама абавязковасці і перыядычнасці выбараў.
Прадметам рэгулявання заканадаўства аб выбарчай сістэме і рэферэндуме з’яўляюцца грамадскія адносіны, якія ўзнікаюць пры падрыхтоўцы і правядзенні выбараў Прэзідэнта Рэспублікі Беларусь, выбараў і адклікання дэпутатаў Палаты прадстаўнікоў Нацыянальнага сходу Рэспублікі Беларусь, членаў Савета Рэспублікі Нацыянальнага сходу Рэспублікі Беларусь, дэпутатаў мясцовых Саветаў дэпутатаў Рэспублікі Беларусь, а таксама пры падрыхтоўцы і правядзенні рэферэндуму (народнага галасавання).
Асноўнай крыніцай у гэтай сферы заканадаўства з’яўляецца Выбарчы кодэкс Рэспублікі Беларусь – кадыфікаваны акт, які найбольш поўна рэгламентуе пераважную большасць пытанняў, звязаных з арганізацыяй і правядзеннем выбараў Прэзідэнта Рэспублікі Беларусь і дэпутатаў розных узроўняў, а таксама арганізацыяй і правядзеннем рэспубліканскіх і мясцовых рэферэндумаў. Падпісаны Прэзідэнтам Рэспублікі Беларусь 20 лютага 2000 г. Выбарчы кодэкс падраздзяляецца на агульную і асаблівую часткі.
Выбарчае заканадаўства з’яўляецца адной з галін права, якая найбольш дынамічна развіваецца. Практыка прымянення заканадаўства ў нашай краіне і вопыт выкарыстання падобнага выбарчага заканадаўства ў іншых краінах з’яўляюцца падставай для ўнясення змен і дадаткаў у законы, якія ўлічваюць у большай ступені сучасныя палітычныя рэаліі і інтарэсы грамадзян краіны.
Экспазіцыя налічвае каля 40 дакументаў: кнігі, брашуры, перыядычныя выданні. Выстаўка змяшчае наступныя тэматычныя раздзелы:
- Выбарчы кодэкс – інстытут канстытуцыйнага права.
- Прэзідэнцкія выбары ў Рэспубліцы Беларусь: арганізацыйна-прававыя аспекты.
- Нарматыўна-прававая аснова выбараў у Нацыянальнысход Рэспублікі Беларусь.
- Выбарчыя сістэмы і выбарчыя тэхналогіі замежных краін.
- Абскарджанне парушэнняў выбарчых праў.
Выстаўка прызначана навуковым работнікам, выкладчыкам, упраўленцам, паліттэхнолагам і ўсім, хто цікавіцца электаральнымі кампаніямі.
Кантактны тэлефон: (8 017) 293 27 28.