З 4 лютага па 3 сакавіка ў зале выяўленчых і відэадакументаў (пам. 307) праходзіць выстаўка “Узнясенне над прозай быцця”, прысвечаная 90-годдзю беларускага жывапісца Леаніда Шчамялёва.
Народны мастак Беларусі, педагог, лаўрэат Дзяржаўнай прэміі Леанід Дзмітрыевіч Шчамялёў – адзін з яркіх прадстаўнікоў беларускага мастацтва. У 2003 г. у Мінску адкрыта персанальная мастацкая галерэя твораў майстра, аснову якой склалі работы, падораныя мастаком гораду.
“У жыцці мне пашчасціла. Я нарадзіўся пад сузор’ем Вадалея і правёў дзяцінства ў маляўнічым Віцебску. Гэта была шчаслівая пара, звязаная з дзівоснай Заходняй Дзвіной, захапленнем спортам, маляваннем, тэатрам, кнігамі… І раптам – вайна! 18-гадовым быў мабілізаваны і пайшоў на фронт… Увосень 1943 г. у жорсткім баі пад Калінкавічамі атрымаў цяжкае раненне. Але лёс мяне захоўваў – выжыў і змог вярнуцца ў армію. У 1947-м дэмабілізаваўся і паступіў у Мінскае мастацкае вучылішча: дзіцячая мара стаць мастаком пачала ажыццяўляцца! Пазней скончыў Беларускі тэатральна-мастацкі інстытут, майстэрню В.К. Цвіркі…” – піша Леанід Шчамялёў у аўтабіяграфічнай кнізе.
Здзіўленне, зачараванне, захапленне – вось што на працягу паўстагоддзя творчасці не астывала ў грудзях Маэстра. Леанід Дзмітрыевіч востра адчувае час: у яго жывапісе не знайсці дробязных мітуслівых пачуццяў, зусім адсутнічаюць агрэсіўнасць і насілле над духам.
Перавагу ён аддае працы ў жанры партрэта і пейзажа. У экспазіцыі прадстаўлены партрэты У. Мулявіна, Я. Купалы, К. Каліноўскага і іншых вядомых дзеячаў.
Таксама ўжо больш за паўстагоддзя мастак працуе ў жанры нацюрморта, успрымаемым ім як выява часу, у якім жыве чалавек. У “Блакітным нацюрморце”, “Кветках для Святланы” і іншых работах – велізарны каэфіцыент цеплатворнасці, энергіі парыву, палон фарбаў і містыка зачараванасці колерам.
Прачулае і перажытае Леанідам Шчамялёвым у дні ваеннага ліхалецця знайшло адлюстраванне ў работах “Прымірэнне”, “Прысяга”, “Пачатак” і многіх іншых.
На выстаўцы прадстаўлена звыш 80 дакументаў. Гэта рэпрадукцыі работ мастака, альбомы, кнігі, часопісы, даведачная літаратура.
Экспазіцыя разлічана на ўсе катэгорыі чытачоў.
Кантактны тэлефон: (8 017) 293 27 58.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
