З 13 чэрвеня па 31 ліпеня ў зале нотных і аўдыядакументаў (пам. 305) арганізавана выстаўка “Увесь свет чалавечых пачуццяў”, прысвечаная 170-годдзю з дня нараджэння нарвежскага кампазітара Эдварда Грыга.
Імя выдатнага кампазітара, піяніста і дырыжора Э. Грыга займае ў еўрапейскай музыцы асаблівае месца. Ён – першы класік нарвежскай музыкі, які паставіў музычную культуру Нарвегіі ў шэраг з перадавымі нацыянальнымі школамі Еўропы. Яго творчасць цесна звязана з жыццём нарвежскага народа, рознымі бакамі яго побыту, выявамі роднай прыроды. Менавіта таму творы Грыга напоўнены рысамі нарвежскага музычнага фальклору. Усе музычна-выразныя сродкі, выкарыстаныя кампазітарам у яго творах (будзь то гармонія, мелодыка, рытміка), нясуць у сабе яркі, фальклорны пачатак, надаючы стылю кампазітара непаўторную індывідуальнасць.
Круг жанраў, да якіх звяртаўся кампазітар, даволі шырокі. Гэта фартэпіянныя творы, якія змяшчаюць у сабе як жанры мініяцюры (вальсы, невялікія лірычныя п’есы), так і буйныя фартэпіянныя творы (санаты, балада). Э. Грыгам напісана велізарная колькасць песень і рамансаў. Важнае месца ў яго творчасці займаюць сімфанічныя творы. Акрамя гэтага, кампазітар звяртаўся да жанраў вакальна-сімфанічнай, тэатральнай і харавой музыкі, а таксама займаўся публіцыстычнай дзейнасцю.
На выстаўцы шырока прадстаўлены кнігі і публікацыі з перыядычных выданняў, прысвечаныя жыццю і творчасці Э. Грыга Сярод дакументаў, што экспануюцца, – “Избранные статьи и письма” кампазітара, выдадзеныя ў Маскве ў 1966 г.
Асноўная частка экспазіцыі – нотныя выданні і аўдыядакументы з фондаў Нацыянальнай бібліятэкі Беларусі. Сярод іх – музыка да драмы Г. Ібсена "Пер Гюнт", канцэрт для фартэп'яна з аркестрам, "Лірычныя п'есы&ruot;, сюіта "З часоў Хольберга", "Паэтычныя малюнкі", "Нарвежскія танцы", а таксама вакальныя сачыненні (рамансы і песні). Наведвальнікі маюць магчымасць праслухаць гэтыя і іншыя творы ў выкананні Вана Кліберна, Эміля Гілельса, Леаніда Когана, Віктара Мяржанава, Міхаіла Плятнёва, Барыса Гмыры, Наталлі Раждзественскай і інш.
Дапаўняюць экспазіцыю рэпрадукцыі партрэтаў Э. Грыга (мастакі А. Гарпенка і Э. Верэншоль).
Кантактны тэлефон: (8 017) 293 27 52.