З 3 студзеня па 13 лютага ў аддзеле абслугоўвання афіцыйнымі дакументамі (пам. 207) адкрыта выстаўка “Устойлівая энергетыка на карысць кожнага”, прысвечаная Дзесяцігоддзю ўстойлівай энергетыкі для ўсіх (2014–2024).
Генеральная Асамблея ААН абвясціла перыяд з 2014 па 2024 год Дзесяцігоддзем устойлівай энергетыкі для ўсіх на сваёй 67-й сесіі 21 снежня 2012 года (A/RES/67/215).
Прадстаўнікі практычна ўсіх дзяржаў – членаў ААН у прынятай рэзалюцыі адзначылі, што забеспячэнне доступу да сучасных і недарагіх паслуг па энергазабеспячэнні будзе спрыяць скарачэнню маштабаў галечы і паляпшэнню ўмоў і ўзроўню жыцця большасці насельніцтва свету.
Якасць энергетычных паслуг аказвае велізарнае ўздзеянне на прадукцыйнасць працы, ахову здароўя, адукацыю, змену клімату, бяспеку харчу і водных рэсурсаў, а таксама паслугі сувязі. Адсутнасць доступу да экалагічна чыстых, недарагіх і надзейных крыніц энергіі стрымлівае развіццё чалавечага патэнцыялу, сацыяльнае і эканамічнае развіццё і з’яўляецца асноўнай перашкодай на шляху дасягнення мэт у галіне развіцця, сфармуляваных у Дэкларацыі тысячагоддзя.
У рэзалюцыі адзначалася, што на сённяшні дзень 2,6 мільярда чалавек у краінах, якія развіваюцца, выкарыстоўваюць для гатавання ежы і ацяплення традыцыйныя віды біямасы і 1,3 мільярда чалавек не маюць доступу да электраэнергіі. Але нават у тых выпадках, калі энергазабеспячэнне прапаноўваецца, мільёны маламаёмасных людзей не могуць яго аплачваць.
На дадзены час доля новых і аднаўляльных крыніц энергіі ў сусветным энергетычным балансе ўсё яшчэ невялікая ў сілу высокага кошту адпаведных тэхналогій. У гэтай сувязі Асамблея рэкамендавала прыняць меры па забеспячэнні эканамічнай эфектыўнасці выкарыстання новых і аднаўляльных крыніц энергіі шляхам больш актыўнага аказання дапамогі ў галіне навуковых даследаванняў і вопытна-канструктарскіх распрацовак.
Рэзалюцыя заклікала ўрады да мабілізацыі фінансавых рэсурсаў, перадачы тэхналогій на ўзаемна ўзгодненых умовах, нарошчвання патэнцыялу і распаўсюджвання новых і існуючых экалагічна бяспечных тэхналогій у краінах, якія развіваюцца, і краінах з пераходнай эканомікай. Генеральная Асамблея ААН рэкамендавала ўрадам ствараць спрыяльныя ўмовы для папулярызацыі і выкарыстання новых і аднаўляльных крыніц энергіі і больш эфектыўнага энергаспажывання.
Захаванне энергетычнай бяспекі дзяржавы застаецца прыярытэтным напрамкам развіцця галіны і з’яўляецца найважнейшым складнікам нацыянальнай бяспекі Рэспублікі Беларусь. На дзяржаўным узроўні прыняты шэраг праграмных дакументаў, якія вызначаюць асноўныя шляхі развіцця энергетычнай галіны. Сярод іх – Канцэпцыя энергетычнай бяспекі Рэспублікі Беларусь, Стратэгія развіцця энергетычнага патэнцыялу Рэспублікі Беларусь, Асноўныя напрамкі энергетычнай палітыкі Рэспублікі Беларусь, Дзяржаўная праграма будаўніцтва ў 2011–2015 гадах гідраэлектрастанцый у Беларусі і інш.
Галоўным прыярытэтам энергетычнай палітыкі нашай дзяржавы з’яўляецца павышэнне эфектыўнасці выкарыстання энергіі як сродку для паніжэння выдаткаў грамадства на энергазабеспячэнне, забеспячэнне ўстойлівага развіцця краіны, павышэння канкурэнтаздольнасці прадукцыйных сіл і аховы навакольнага асяроддзя.
Выстаўка налічвае каля 100 дакументаў. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя ўключае наступныя тэматычныя раздзелы:
- Сусветная энергетыка: стан, праблемы, перспектывы.
- Міжнародная энергетыка і экалагічная бяспека.
- Аднаўляльныя крыніцы энергіі і энергазахаванне.
- Энергетычная палітыка і шляхі развіцця энергетыкі асобных краін і рэгіёнаў.
- Энергетычная палітыка Рэспублікі Беларусь.
Выстаўка будзе цікавай спецыялістам у сферы энергетыкі, інжынерна-тэхнічным работнікам, эколагам, палітолагам, сацыёлагам, а таксама студэнтам, аспірантам і выкладчыкам ВНУ.
Карысныя спасылкі
- Міжнародны год устойлівай энергетыкі для ўсіх
- ААН і ўстойлівае развіццё
- Энергія і прыродныя рэсурсы
- Камісія па ўстойлівым развіцці
- Арганізацыя Аб’яднаных Нацый па прамысловым развіцці*
- UN-Energy*
- International Renewable Energy Agency*
- Глабальны дагавор ААН*
Дакументы
- Рэзалюцыі Генеральнай Асамблеі
- Рэзалюцыі ЭКАСАС
- Даклады і запіскі генеральнага сакратара
- Ёгаханесбургская дэкларацыя па ўстойлівым развіцці