З 19 лістапада па 9 снежня ў зале нотных і аўдыявізуальных дакументаў (пам. 305) праходзіць выстаўка “Услухайся сэрцам...”, прысвечаная 90-годдзю з дня нараджэння беларускага кампазітара, піяніста Ю.У. Семянякі (1925–1990).
Асноўным жанрам у творчасці Юрыя Уладзіміравіча Семянякі з’яўлялася песня. Ім напісана больш за 300 песень, пераважна на вершы беларускіх паэтаў. Пяшчотай пачуццяў і светлым каларытам афарбаваны змест песень аб Радзіме – адной з галоўных тэм яго песеннай творчасці. За стварэнне патрыятычных песень Ю.У. Семеняка ўдастоены Дзяржаўнай прэміі БССР (1972).
Песні кампазітара ўвайшлі ў рэпертуар ансамбляў “Пясняры”, “Сябры”, “Верасы”; ён таксама з’яўляецца аўтарам 4 опер (самыя вядомыя з якіх – “Зорка Венера” па матывах твораў М. Багдановіча і “Новая зямля” па матывах аднайменнай паэмы Я. Коласа), музычных камедый, кантат, беларускай аперэты (музычная камедыя “Паўлінка” па аднайменнай п’есе Я. Купалы), музыкі да кінафільмаў, радыё- і тэлеспектакляў.
Песеннасць – характэрная рыса амаль усіх яго твораў, у тым ліку і самых буйных. Меладычная шчодрасць, шчырасць і сардэчнасць інтанацый, лірызм, цесная сувязь з традыцыйнай беларускай музыкай, трывалая апора на беларускі фальклор – гэтыя якасці заўсёды былі ўласцівы творам Ю. Семянякі, аўтара цудоўных песень “Явар і каліна”, “Ты мне вясною прыснілася”, “Беларусь – мая песня”, “Трава дзяцінства”, “Люблю цябе, Белая Русь!”, “Не за вочы чорныя” і інш.
Асновай выстаўкі сталі нотныя выданні песеннай творчасці кампазітара. На выставачных стэндах – зборнікі песень: “Лірычныя песні” (1963), “Беларусь – мая песня” (1971), “Табе маё прызнанне” (1974), “Поёт ансамбль «Песняры»” (1974), “Спяваюць «Песняры»” (1975), “Я сэрцам з табой” (1976), “Мая Радзіма” (1979), “Наш край” (1984), “Поёт «Журавінка»” (1984), “Спяваюць «Верасы»” (1985) і інш.
Працягваюць экспазіцыю нотныя выданні: урыўкі з оперы “Калючая ружа”, “Арии и сцены из оперетт”, кантаты “Памяти Константина Заслонова”, “Венок Максима Богдановича”, хоры, рамансы, апрацоўкі беларускіх народных песень.
Дапаўняюць падборку матэрыялаў аўдыязапісы, энцыклапедычныя выданні, артыкулы пра творчасць юбіляра.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
