З 1 па 30 жніўня 2008 года ў чытальнай зале беларускай літаратуры (пам. 205) праходзіць юбілейная выстаўка "Услаўляючы радасць жыцця", прысвечаная 80-годдзю з дня нараджэння Браніслава Пятровіча Спрынчана, беларускага рускамоўнага паэта, перакладчыка, які трагічна загінуў 8 ліпеня 2008 года.
У сваёй творчасці Браніслаў Спрынчан усхваляў справы, якімі займаецца чалавек на карысць людзям. Жыццёвая праўдзівасць складае пафас большасці яго вершаў. Паэт-лірык услаўляў прыгажосць жыцця, прыроду, каханне да жанчыны, любоў да Радзімы, уздымаў экалагічныя праблемы.
Увазе наведвальнікаў выстаўкі прадстаўлена каля 70 адзінак дакументаў, якія сістэматызаваны ў некалькіх раздзелах.
Аснову першага раздзела “Права на будучыню" складаюць зборнікі паэзіі Б. Спрынчана: "Над кручами Сожа" (1957), "В центральном пролете" (1961), "Ветер на откосах" (1964), "Плавка" (1968), "Чертылица" (1970), “Ясень" (1973), “Вечная страда" (1978), “Стремнина" (1983), "Сотворение" (1983), "Надежды нежные ростки" (1986), “Свет любви” (1988), "Васильки на беломполотне" (1990), "Жизни вечные круги" (1990), “Смутный день” (1994), “Вербная неделя” (2002), “Осенний вереск” (2006). Працягам з’яўляецца экспазіцыя публікацый твораў аўтара, змешчаных у калектыўных паэтычных зборніках і часопісах .
Перакладчыцкая дзейнасць Б.П. Спрынчана прадстаўлена ў раздзеле "Вынік натхнёнай працы" зборнікамі такіх паэтаў, як П. Макаль, М. Багдановіч, асобнымі вершамі Я. Коласа, П. Броўкі, М. Танка, П. Панчанкі, Р. Барадуліна, А. Пысіна, Я. Янішчыц і інш. Б. Спрынчан сумесна з Г. Пашковым з’яўляўся ўкладальнікам зборніка “Роднасць” (змяшчае творы беларускіх і рускіх пісьменнікаў на дзвюх мовах) і кнігі "Зорка зорцы голас падае”, у якую ўвайшлі выбраныя вершы М. Лермантава на рускай мове і ў перакладзе А. Куляшова на беларускую мову. Гэтыя выданні таксама прадстаўлены ў дадзеным раздзеле.
Шмат твораў Б. Спрынчана выдадзена ў перакладах на беларускую, украінскую, казахскую мовы. Усе гэтыя творы экспануюцца ў раздзеле "Шчырае пастаянства". На выстаўцы прадстаўлены як асобныя зборнікі паэта, так і публікацыі ў перыядычных выданнях.
Раздзел "Свет паэта" змяшчае публікацыі аб жыцці і творчасці юбіляра. Аўтарамі артыкулаў з’яўляюцца С. Гаўрусёў, А. Грыгарэнка, В. Ліпневіч, М. Мішчанчук, І. Саламевіч і інш.
Кантактны тэл. 293-77-16
