З 30 студзеня па 2 сакавіка ў Нацыянальнай бібліятэцы Беларусі праходзіць мастацкая і тэматычная кніжная выстаўка з аднайменнай назвай "Усе стыхіі".
Прырода шчодра падаравала чалавецтву ўсё, што неабходна яму для існавання. Чалавек па-свойму прыстасаваўся да яе ўмоў, нават часам і да яе капрызаў. Нам здаецца, што мы вывучылі нашу планету ўздоўж і папярок, а вывучыўшы, асвоілі яе прыродныя рэсурсы, заваявалі глыбіні акіяна і пачалі пакараць космас. Аднак сілы прыроды яшчэ не да канца падуладныя чалавецтву, неспакойная Зямля мацней за нас. Бываюць такія трагічныя сітуацыі і акалічнасці, калі чалавек не мае сілы штосьці здзейсніць для свайго выратавання. Мы жывем на планеце, дзе кіруюць стыхіі, і дагэтуль бяссільныя супраць іх!
Стыхіі нашай планеты – тэма прадстаўленай выстаўкі, якая ўвабрала ў сябе мноства навуковых звестак і фактаў аб воднай, вогненнай, зямной і паветранай стыхіях: паводках і ўраганах, пясчаных бурах і вывяржэннях вулканаў, абвалах і цунамі, міражах і метэарытах, гейзерах, землятрусах...
Аб сілах прыроды, па-ранейшаму непазнаных і непакорных, аб самых грандыёзных прыродных катаклізмах і тэхнагенных катастрофах, якія ўзрушылі чалавецтва, аб цікавых знаходках навукоўцаў, аб рэкордных праявах стыхіі (часта трагічных, але часам і кур’ёзных) і аб тым, што нас, магчыма, яшчэ чакае ў будучыні, і распавядае выстаўка.
Экспазіцыя налічае больш за 100 дакументаў навукова-папулярнага характару. Гэта кнігі папулярнай серыі «100 великих», кнігі-сенсацыі, самыя разнастайныя энцыклапедыі, даведнікі аб надвор’і, якія ахопліваюць усе краіны свету, даведнікі па самых таямнічых, загадкавых і святых месцах планеты, навуковыя манаграфіі з дэталёвымі звесткамі аб глабальных зменах у клімаце, даследаванні анамальных з’яў у прыродзе і г. д.
Асаблівую цікавасць уяўляюць такія кнігі, як «Силы и законы природы» фізіка, дацэнта Венскага універсітэта А. Лампа (1898), дзе зразумела і займальна выкладзены асноўныя тэарэтычныя паняцці сучаснай фізікі, а таксама «Вулканы и землетрясения» нямецкага прафесара М. Неймара (1902).
Выстаўка размешчана ў кальцавым калідоры 2-га паверха (каля галерэі «Ракурс»).
Кантактны тэлефон 293-28-86
 |
 |
 |
|
 |
 |
 |
|
 |
 |
