З 13 красавіка па 28 чэрвеня ў зале нотных і аўдыядакументаў (пам. 305) арганізавана выстаўка “Унікальны гукавы свет Сяргея Пракоф’ева”, прысвечаная 120-годдзю рускага кампазітара, піяніста, дырыжора С.С. Пракоф’ева (1891–1953).
Сяргей Сяргеевіч Пракоф’еў увайшоў у гісторыю расійскай і сусветнай музычнай культуры як геніяльны кампазітар, наватар, які стварыў глыбока самабытны стыль, сваю сістэму выразных сродкаў. Яго музыка ўвасабляе гарманічнае і радаснае адчуванне жыцця, прасякнута духам дзейснай энергіі. Яна разнастайная па змесце, які яднае ў сабе эпас і лірыку, драматызм і гумар, характарыстычнасць і псіхалагізм.
Трывала звязаная з традыцыямі мінулага, творчасць Пракоф’ева пашырыла межы музычнага мастацтва ў галіне мовы, зместу, сродкаў выразнасці, уяўляючы сабой перадавую і наватарскую з’яву сучаснай эпохі.
Оперная і балетная творчасць кампазітара, якая ахоплівае шырокае кола нетрадыцыйных сюжэтаў, новыя прынцыпы і прыёмы музычнай драматургіі, належыць да ліку рэфарматарскіх заваёў музычнага тэатра.
Не менш значныя дасягненні Сяргея Пракоф’ева ў іншых жанравых сферах. Такімі з’яўляюцца яго 7 сімфоній, што своеасабліва сінтэзуюць і развіваюць традыцыі эпічнага і лірыка-жанравага сімфанізму.
Самабытны стыль фартэпіянных сачыненняў Сяргея Сяргеевіча Пракоф’ева (9 санат і 5 канцэртаў, цыклы) з яго ўдарнай трактоўкай інструмента і прымяненнем раннекласіцысцкіх фактурных прыёмаў адыграў значную ролю ў фарміраванні новага піянізму ў музыцы XX ст.
Музыка Сяргея Пракоф’ева, заваяваўшы велізарную папулярнасць ва ўсім свеце, аказала значны ўплыў на творчасць многіх савецкіх і замежных кампазітараў.
На выстаўцы прадстаўлена звыш 150 дакументаў. Сярод іх – кнігі пра жыццё і дзейнасць С. Пракоф’ева, дзённікі кампазітара, гуказапісы твораў, у тым ліку і яго выканальніцкая творчасць, прадстаўленыя на кампакт-дысках і грампласцінках. Шырока экспануюцца і нотныя выданні твораў аўтара: балеты, оперы, канцэрты, сімфоніі, санаты, музыка да тэатральных пастановак і кінафільмаў, дзіцячая музыка.
Кантактны тэлефон: 293-27-53.