З 5 верасня па 3 кастрычніка ў зале беларускай літаратуры (пам. 205) праходзіць выстаўка “Улюбёны ў роднае слова”, прымеркаваная да 100-годдзя з дня нараджэння беларускага мовазнаўца, заснавальніка беларускай фразеалогіі, пісьменніка, фалькларыста Фёдара Янкоўскага.
У гісторыі кожнага народа ёсць людзі, якія прыходзяць у самы складаны час, каб сваёй мудрасцю і талентам асвятліць шлях у будучыню, акрэсліць асноўныя кірункі дзейнасці нацыі. Такім быў і застаўся назаўсёды Фёдар Міхайлавіч Янкоўскі (1918–1989) – доктар філалагічных навук, прафесар, настаўнік з вялікай літары, заслужаны дзеяч навукі Беларусі, член Саюза беларускіх пісьменнікаў. Асноўным у жыцці гэтага выдатнага беларускага філолага, руплівага даследчыка роднага слова было служэнне свайму краю.
У творчай спадчыне вучонага каля 300 прац: манаграфіі, навучальныя дапаможнікі, падручнікі, навуковыя артыкулы па беларускім і агульным мовазнаўстве, культуры мовы. Сярод экспанатаў выстаўкі – “Дыялектны слоўнік” (вып. 1–3), “Беларускае літаратурнае вымаўленне”, “Беларуская фразеалогія”, “Гістарычная граматыка беларускай мовы”, а таксама зборнікі крылатых слоў і афарызмаў, прыказак і прымавак, параўнанняў, фразеалагічныя і тлумачальныя слоўнікі.
Лінгвістычныя працы па-свойму дапаўняюць літаратурныя творы – навелы, апавяданні, нарысы, мініяцюры, якія ўвайшлі ў кнігі “Абразкі”, “Прыпыніся на часіну”, “Радасць і боль”, “З нялёгкіх дарог” і інш.
Выданні, у якіх Фёдар Міхайлавіч выступае як складальнік або рэдактар, прадстаўлены ў асобным раздзеле.
Апошняя частка экспазіцыі з дапамогай біяграфічных і літаратурна-крытычных публікацый больш падрабязна знаёміць з жыццём і творчасцю выдатнага мовазнаўца, пра якога напісана шмат добрых і шчырых слоў.
Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра бібліятэкі.
