З 30 студзеня па 9 сакавіка ў зале беларускай літаратуры (пам. 205) праходзіць выстаўка “У вандроўцы за марай”, прысвечаная 80-годдзю А.С. Ліса, беларускага фалькларыста, літаратуразнаўца і краязнаўца.
У трох раздзелах выстаўкі – “Натхнёная рапсодыя”, “Святло дабрыні і працавітасці”, “Плён перажытага” – з паўнатой раскрыта творчасць таленавітага навукоўца і пісьменніка Арсеня Сяргеевіча Ліса.
У экспазіцыі прадстаўлены як манаграфіі, так і мастацкія творы вучонага. Сярод іх: “Браніслаў Тарашкевіч” (1966), “Мікола Шчакаціхін” (1968), “Пётра Сяргіевіч” (1970), “Купальскія песні” (1974), “Вечны вандроўнік” (1984), “Цяжкая дарога свабоды” (1994), “Каляндарна-абрадавая творчасць беларусаў. Сістэма жанраў. Эстэтычны аспект” (1998), “Беларуская каляндарна-абрадавая песня ў кантэксце фальклорных традыцый славян” (2008) і інш. Адметнае месца на выстаўцы займае збор твораў аўтара “Gloria victis!” (2010), які складаецца з артыкулаў, міні-манаграфій, эцюдаў, прысвечаных жыццю і дзейнасці вучоных, мастакоў, этнамузыколагаў, паэтаў, а таксама ўключае сціслы агляд мастацкай літаратуры Заходняй Беларусі.
Ужо ў дзяцінстве Арсень Сяргеевіч упітаў любоў да беларускай народнай песні. Сям’я будучага фалькларыста была песенная і беларускамоўная. Яго маці Алена Юстыфаўна вельмі хораша спявала не толькі беларускія народныя песні, але і песні на словы Янкі Купалы і Якуба Коласа.
Беларуская песня стала галоўным аб’ектам навуковага пошуку даследчыка і прынесла яму вялікі поспех і пашану.
Навуковая абгрунтаванасць і глыбіня, любоў і працавітасць – вось галоўныя рысы дзейнасці даследчыка і літаратара.
Апошні раздзел выстаўкі ўключае матэрыялы пра юбіляра.
Усяго экспазіцыя налічвае каля 100 выданняў.
Кантактны тэлефон: (8 017) 293 27 16.