!["У пачатку было Слова..."](/upload/iblock/71e/71e784510239b97c15ff1b6fddfaebfd.jpg ""У пачатку было Слова..."")
З 22 жніўня па 30 снежня ў Нацыянальнай бібліятэцы Беларусі (3-ці паверх, кальцавы калідор) размешчана выстаўка “У пачатку было Слова...”, прысвечаная 1150-годдзю славянскага пісьменства.
Хрышчэнне Русі і зараджэнне на яго аснове старажытнага славянскага пісьменства – гэта адна з найбольш значных падзей ранняга Сярэднявечча, пераломны момант у нацыянальнай культуры ўсіх усходнеславянскіх народаў. Менавіта з гэтага часу пачынаецца новы, сапраўды цывілізацыйны перыяд развіцця духоўнай культуры і асветы славянскіх народаў, іх імклівае ўключэнне ў еўрапейскі гісторыка-літаратурны і культурны працэс.
Тэматычная кніжная выстаўка Нацыянальнай бібліятэкі Беларусі “У пачатку было Слова...”, экспазіцыя якой налічвае каля 200 выданняў, складаецца з двух блокаў.
У першым блоку “Славянскі свет: ад вытокаў у будучыню” прадстаўлены кнігі, у якіх паказана ўзнікненне і развіццё пісьменства на славянскіх землях. Асноўную частку экспазіцыі складаюць кнігі, прысвечаныя гісторыі кірылічнай пісьменнасці і першаасветнікам і святым, роўнаапостальным Кірылу і Мяфодзію. Менавіта яны сталі заснавальнікамі новай хрысціянскай культуры і пісьменнасці на землях старажытнай Беларусі, Расіі і Украіны.
Прадстаўлены кніжныя выданні старажытнарускіх і ўкраінскіх летапісаў. Таксама экспануюцца кнігі, якія распавядаюць пра помнікі дакірылічнай пісьменнасці і руны – магічны алфавіт Паўночнай Еўропы.
Другі блок экспазіцыі “Свята беларускага пісьменства” складаецца з выданняў, у якіх адлюстравана гісторыя зараджэння і развіцця пісьменства на Беларусі, распавядаецца пра помнікі старажытнай беларускай літаратуры. Асобная ўвага нададзена кнігам, якія прысвечаны беларускім асветнікам: Францыску Скарыну, Сімяону Полацкаму, Соф’і Слуцкай, Кірылу Тураўскаму, Еўфрасінні Полацкай, Сымону Буднаму, Васілю Цяпінскаму, Івану Фёдараву. Усе гэтыя славутыя імёны – гонар беларускай зямлі. Кожны з гэтых людзей сваёй рознабаковай дзейнасцю закладваў падмурак беларускай нацыянальнай культуры, плённа працуючы на ніве асветы.
Кантактныя тэлефоны: (8 017) 293 28 86, 293 29 80.
 |
 |
 |
 |
 |
 |
 |
 |
 |
 |
 |
 |
