З 10 па 30 жніўня ў зале нотных і аўдыявізуальных дакументаў (пам. 305) праходзіць юбілейная выстаўка “У нястомным пошуку”, прысвечаная 110-годдзю з дня нараджэння беларускага кампазітара Д.Р. Камінскага (1907–1989).
Творчасць Дзмітрыя Раманавіча Камінскага звяртае на сябе ўвагу шырынёй інтарэсаў да самых разнастайных музычных жанраў і формаў. Ён аўтар шматлікіх твораў для сімфанічнага, народнага і эстраднага аркестраў, камерна-інструментальнай і харавой музыкі. Таксама кампазітар пісаў тэатральную, харэаграфічную і кінамузыку, песні, ствараў арыгінальныя транскрыпцыі і перакладанні асобных нумароў.
Галоўным напрамкам ягонай творчасці зрабілася інструментальная музыка. На выстаўцы прадстаўлены інструментальныя канцэрты для цымбалаў, скрыпкі, фартэпіяна. Канцэрт для скрыпкі з аркестрам № 2 напісаны з глыбокім веданнем спецыфікі саліруючага інструмента, прыцягвае яркім меладызмам, дынамікай, інструментоўкай. Выклічуць цікавасць творы кампазітара для фартэпіяна, скрыпкі, баяна, флейты, домры, віяланчэлі, ансамбляў.
У экспазіцыі таксама размешчаны творы Д.Р. Камінскага для дзяцей і юнацтва: “Восень”, “Пад сонейкам”, “На дудках”, “Сумнае разважанне” і іншыя.
Беларускі нацыянальны каларыт выразна адчуваецца ў музыцы Дзмітрыя Раманавіча. Тэмы твораў прасякнуты народнымі зваротамі, беларускімі папеўкамі. На выстаўцы прадстаўлены творы кампазітара для аркестра народных інструментаў “Фантазіі на тэмы беларускіх песень”, “Беларускі танец”, “Беларускі маладзёжны танец”, “Беларуская фантазія” ў выкладзе для духавога аркестра, “Беларуская тэма з варыяцыямі” для домры з суправаджэннем фартэпіяна, а таксама адзін з найлепшых твораў аўтара – "Варыяцыі для цымбалаў на тэму беларускай народнай песні «Восень»”.
Наведвальнікі могуць пазнаёміцца з нотнымі выданнямі твораў кампазітара, аўдыядакументамі з фондаў Нацыянальнай бібліятэкі Беларусі, публікацыямі пра жыццё і творчасць юбіляра.
Кантактны тэлефон: (8 017) 293 27 52.