З 1 верасня па 27 кастрычніка ў зале перыядычных выданняў (пам. 106) праходзіць тэматычная выстава “У нагу з часам: сучаснасць і будучыня бібліятэкі ў лічбавую эпоху”.
Дзесяцігоддзі існавання Сусветнай павуціны прынеслі масу карысных навін: электронная пошта, сацыяльныя сеткі, мабільныя тэхналогіі, воблачныя вылічэнні і г.д. Пачалася эпоха Інтэрнэту рэчаў.
У лічбавую эпоху значэнне інфармацыйнай культуры імкліва павялічваецца і на бібліятэку кладзецца павышаная адказнасць за фарміраванне навыкаў правільнага фармулявання пошукавых запытаў, арыентавання ў самых разнастайных інфармацыйных рэсурсах. Невымерна ўзрастае роля адбору і ацэнкі дакладнасці сеткавай інфармацыі. Пытанні развіцця бібліятэк у напрамку паскоранай лічбавізацыі працэсаў і паслуг асвятляюць публікацыі ў часопісах “Бібліятэчны свет”, “Современная библиотека”, “Наука и инновации” і інш.
У бібліятэках ужо выкарыстоўваюцца інфармацыйныя сістэмы ўліку наведвальнікаў, ажыццяўляецца алічбоўка культурнай спадчыны, фарміруюцца электронныя базы даных, ствараюцца інфармацыйныя парталы, віртуальныя выставы, укараняюцца тэхналогіі дапоўненай і віртуальнай рэальнасці. Лічбавізацыя стварае якасна новыя магчымасці для бібліятэчна-інфармацыйнага абслугоўвання з улікам таго, што доступ да рэсурсаў і паслуг бібліятэк сёння ажыццяўляецца ў рэжыме 24/7 з любой кропкі свету. Тэмы развіцця рынку новых бібліятэчных тэхналогій (распрацоўка мабільных праграм, рабатызацыя, стварэнне вэб-архіваў, чат-камунікацыі і інш.) знайшлі адлюстраванне ў артыкулах з перыядычных выданняў “Научные и технические библиотеки”, “Библиотековедение”, “Вестник БАЕ”.
Матэрыялы выданняў “Архівы і справаводства”, “Библиотека”, “Библиография” прысвечаны пытанням папулярызацыі бібліятэк у сацыяльных сетках, вядзення бібліятэчных сайтаў і блогаў, фарміравання актуальных электронных рэсурсаў, развіцця бібліяграфіі ў лічбавым асяроддзі.
Усяго экспазіцыя налічвае каля 40 перыядычных выданняў.
Спіс літаратуры
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 87.
Матэрыял пададзены аддзелам абслугоўвання спецыялізаванымі фондамі.