З 1 ліпеня па 26 жніўня ў зале перыядычных выданняў (пам. 106) праходзіць тэматычная выстава “У гармоніі з сабой і светам”.
З пункту гледжання псіхалогіі, гармонія – гэта душэўная раўнавага, адпаведнасць рэчаіснасці і навакольных рэалій нашым унутраным адчуванням. Сучасны чалавек рэдка гарманічны: практычна ўсе людзі жывуць у стрэсе. Падаўленне балючых эмоцый знаходзіць выхад праз цела, што нярэдка выклікае хваробы. Але варта толькі пачаць прыслухоўвацца да сваіх эмоцый, як стане магчыма ўстанавіць сувязь з самім сабой, выказаць сваё Я і стаць больш зразумелым людзям, быць шчаслівым і адчуваць сябе жывым. Падыходы да вырашэння гэтых пытанняў адлюстраваны ў прадстаўленых на выставе часопісах “Psychologies”, “Здоровье”, “Психология и Я” і інш.
Рэгулярныя стрэсы і вялікія нагрузкі выбіваюць чалавека са звыклай каляіны. Адны лёгка пераадольваюць жыццёвыя перашкоды, другія канцэнтруюцца на няўдачах і цяжкасцях, якія выпалі на іх долю. Яны апускаюць рукі, замыкаюцца ў сабе, бачаць свет у чорных фарбах. Як быць у такіх сітуацыях? Што такое стрэс і як з ім змагацца? Адказы – у перыядычных выданнях “Витебские вести”, “Народная асвета”, “Минская школа сегодня”.
Часта следствам пастаяннага стрэсу становіцца эмацыйнае выгаранне. Яго вызначаюць як пачуццё вычарпання энергіі, павелічэнне разумовай дыстанцыі ад працы, цынічнае або негатыўнае стаўленне да яе, а таксама падзенне прафесійнай прадукцыйнасці. Як дапамагчы сабе ў няпростыя часы распавядаюць артыкулы ў часопісах “Проблемы управления”, “Пралеска”, “Диалог”.
Усяго экспазіцыя налічвае каля 30 перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 87.
Матэрыял пададзены аддзелам абслугоўвання спецыялізаванымі фондамі.
