З 20 мая па 28 чэрвеня ў зале дакументаў па мастацтве (пам. 306) праходзіць кніжна-ілюстрацыйная выстаўка "Творца ўласнага сусвету", прысвечаная 545-годдзю з дня нараджэння вялікага нямецкага жывапісца Альбрэхта Дзюрэра.
Жывапісец, гравёр, малявальшчык і вучоны, адзін з перадавых людзей свайго часу Альбрэхт Дзюрэр (1471–1528) жыў і працаваў у эпоху Паўночнага Адраджэння – мастацкага перыяду, які атрымаў развіццё ў ХV–ХVI стагоддзях у краінах Паўночнай Еўропы. Гэта быў час перамен у грамадскім і духоўным жыцці, новы шлях развіцця навукі і культуры, "эпоха, якая мела патрэбу ў тытанах". Альбрэхт Дзюрэр ярка ўвасобіў вобраз рэнесанснага мастака-мысліцеля, універсальнага майстра, сапраўды вялікага творцы.
Роля Дзюрэра ў развіцці мастацтва Германіі цалкам выключная. Ён адным з першых пачаў працаваць з натуры, ужываў перспектыўныя скарачэнні і трохвымернасць малюнка, напісаў шэраг трактатаў для мастакоў. Майстар сур’ёзна займаўся матэматыкай, астраноміяй і астралогіяй, оптыкай, геаграфіяй, горадабудаўніцтвам і фартыфікацыяй, вывучаў расліны і жывёл, пісаў вершы. Ствараючы ўласны сусвет, ён унёс неацэнны ўклад ва ўдасканаленне чалавечай цывілізацыі.
Вяршыні сваёй творчасці Дзюрэр дасягнуў у графіцы, падняўшы на новую прыступку мастацтва ксілаграфіі і афорта. Шырока вядомыя яго графічныя серыі "Апакаліпсіс", "Пакуты", "Жыццё Марыі", "Майстэрні гравюры". Іх асобныя рэпрадукцыі складаюць значную частку экспазіцыі.
Сярод прадстаўленых на выстаўцы дакументаў – трактаты і пісьмы нямецкага мастака, распрацоўкі шрыфтоў, яго тэарэтычная спадчына ў галіне дакладных навук. Прывабяць увагу і малюнкі Дзюрэра, сярод якіх "Рукі таго, хто моліцца", "Заяц", "Насарог", асобныя пейзажы і замалёўкі.
Выстаўку дапаўняюць знакамітыя аўтапартрэты Дзюрэра, у якіх майстар праяўляе цікавасць да чалавечай асобы і праводзіць смелую думку, што ўсякі мастак – творца, а значыць, падобны Богу.
Несумнеўную цэннасць экспазіцыі надае фундаментальнае даследаванне пра Дзюрэра вядомага нямецкага мастацтвазнаўца Эрвіна Панофскага "Albrecht Dürer" (1945), у якім творчасць майстра разглядаецца ў кантэксце мастацтва Германіі і Італіі.
Усяго на выстаўцы прадстаўлена звыш 50 дакументаў, у ліку якіх альбомы рэпрадукцый, каталогі выставак, кнігі і паштоўкі.
Кантактны тэлефон: (8 017) 293 27 53.