З 5 кастрычніка па 7 лістапада ў зале беларускай літаратуры (пам. 205) праходзіць выстаўка “Творчае крэда”, прысвечаная 80-годдзю беларускага вучонага-лінгвіста, доктара філалагічных навук, прафесара Г.А. Цыхуна.
На выстаўцы, якая складаецца з двух раздзелаў, прадстаўлены навуковыя працы даследчыка, а таксама літаратура пра творчы і жыццёвы лёс юбіляра.
Навуковыя інтарэсы таленавітага вучонага характарызуюцца разнастайнасцю і шырынёй. Яны ўключаюць балканістыку, арэальную лінгвістыку, тыпалагічныя даследаванні, этымалогію, тэорыю літаратурнай мовы, гісторыю славістыкі, кампаратывістыку, месца беларускай мовы сярод іншых славянскіх моў, лінгвістычную бібліяграфію.
Адметнае месца ў экспазіцыі займаюць манаграфіі на аснове кандыдацкай і доктарскай дысертацый па балкана-славянскай праблематыцы – “Синтаксис местоименных клитик в южнославянских языках (Балкано-славянская модель)” (1968) і “Типологические проблемы балкано-славянского языкового ареала” (1981).
Наведвальнікі выстаўкі маюць магчымасць пазнаёміцца з важкай працай таленавітага навукоўца ў галіне беларускага мовазнаўства – “Этымалагічным слоўнікам беларускай мовы”, 13 тамоў якога ўбачылі свет за перыяд з 1978 па 2010 год. Як аўтар і рэдактар Генадзь Апанасавіч прыняў удзел у падрыхтоўцы дзевяці тамоў (1, 2, 7–13), асабіста і ў суаўтарстве стварыўшы не менш за 9 000 артыкулаў, многія з якіх ужо ўвайшлі ў залаты фонд славянскай этымалогіі.
Сярод экспанатаў – унікальнае выданне “Тураўскі слоўнік” у 5-ці тамах (1982–1987), якое падрыхтавана ў суаўтарстве і атрымала шырокую вядомасць не толькі ў спецыялістаў краіны, а і па-за межамі Беларусі.
Усяго на выстаўцы прадстаўлена звыш 50 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
