З 4 студзеня да 22 лютага ў Нацыянальнай бібліятэцы Беларусі (3-ці паверх, кальцавы калідор) ладзіцца тэматычная кніжная выстаўка “Трыумф чалавечага розуму”.
У сучасным свеце чалавек паўсюль сутыкаецца з вынікамі дзейнасці вучоных і вынаходнікаў. Ва ўсе часы знаходзіліся людзі, якія імкнуліся скарыстаць свае веды і інтэлект, каб зрабіць жыццё лепшым і лягчэйшым. Сёння мы прымаем іх вынаходствы, не задумваючыся пра тое, што ў свой час іх з’яўленне істотна ўплывала на далейшы шлях развіцця навукі.
Прапанаваная ўвазе наведвальнікаў выстаўка дае магчымасць пазнаёміцца з выдатнымі вучонымі ўсіх часоў, якія дабіліся сусветнага прызнання ў розных галінах навукі, тэхналогій і іншых відах чалавечай дзейнасці.
Каля 300 кніг, прадстаўленых у экспазіцыі, захапляльна апісваюць жыццё і творчасць мысліцеляў, вучоных, вынаходнікаў, якія сапраўды змянілі свет. Шматлікія раздзелы экспазіцыі – “Гісторыя навукі”, “Людзі пытлівай думкі”, “Найвялікшыя творы чалавецтва”, “Фантастычныя магчымасці бліжэйшай будучыні: нанатэхналогіі” – гавораць самі за сабе. Такія кніжныя серыі, як “Открытия, которые потрясли мир”, “Наука. Мировоззрение. Жизнь”, “Великие мыслители”, “Шедевры инженерной мысли” і г.д., несумненна, выклікаюць цікавасць і вабяць увагу чытачоў.
Кнігі серый “Нашы славутыя землякі” і “Люди белорусской науки” распавядаюць непасрэдна пра лёс і творы беларускіх вучоных.
Кантактныя тэлефоны: 293-28-86, 293-29-80.
 |
 |
 |
 |
 |
 |
 |
 |
 |
