З 27 красавіка па 22 чэрвеня ў зале нотных і аўдыявізуальных дакументаў (пам. 305) праходзіць выстаўка “Танцавальны лабірынт”, прымеркаваная да Міжнароднага дня танца.
Танец – гэта ўнікальны невярбальны спосаб самавыяўлення, зносіны з навакольным светам, магчымасць больш смела паказаць стаўленне да сябе і іншых. Гэта мова, якую разумее ўвесь свет. А яшчэ – гэта прыгожы і прыемны від правядзення вольнага часу. Заняткі танцамі разнявольваюць цела і душу, дапамагаюць падтрымліваць сябе ў належнай фізічнай форме, ствараюць цікавы круг зносін. Танец непарыўна звязаны з унутраным эмацыянальным светам чалавека і знаходзіць сваё ўвасабленне ў рухах, фігурах, кампазіцыях.
Існуе велізарнае мноства відаў, кірункаў і стыляў танца. У кожнага з іх свая гісторыя, свая мэта, свае асаблівасці і свая прыгажосць. На выстаўцы вылучаны найбольш папулярныя віды танца: народныя, бальныя і сучасныя.
Сярод прадстаўленых у экспазіцыі дакументаў – кнігі аб гісторыі ўзнікнення і развіцця танца (С.М. Худзякоў “Иллюстрированная история танца” (2009), “Всеобщая история танца” (2010), Э.А. Каралёва “Ранние формы танца” (1977), “Танец и художественная культура” (1997), В.У. Ром “Древнейшие танцы” (2011)); аб відах танца (Ю.М. Чурко “Вянок беларускіх танцаў” (1994), Л.К. Алексютовіч “Беларускія народныя полькі” (1995), В.М. Нілаў “Северный танец” (2001), А.А. Клімаў “Основы русского народного танца” (2004), А. Мур “Бальные танцы” (2004), К.А. Васеніна “Российский современный танец. Диалоги” (2005), Н.А. Аляксандрава “Танец модерн” (2011)) і інш.
Дапаўняюць выстаўку нотныя выданні “Три белорусских танца” (1955) , “Танцы народов мира” (1964), “Polonezy, kozaki, mazury” (1973), А. Карэлі “Куранта” (1931), М.І. Рызоль “Полька” (1962), Я.Д. Кузняцоў “Современные русские танцы” (1988) і інш., а таксама аўдыядакументы: серыя кампакт-дыскаў “Бальные танцы”, запісы танцавальнай музыкі калектываў “Харошкі”, “Неруш” і інш.
Усяго экспазіцыя налічвае больш за 100 дакументаў.
Кантактны тэлефон: (8 017) 293 27 52.