З 15 студзеня па 22 лютага ў зале дакументаў па мастацтве (пам. 306) праходзіць кніжна-ілюстрацыйная выстаўка “Тандэм натхнення”, прысвечаная 90-годдзю з дня нараджэння беларускіх мастакоў Георгія Георгіевіча Паплаўскага (1931–2017) і Наталлі Мікалаеўны Паплаўскай (1931).
Няўмольна бяжыць час, але не бясследна. Нашчадкі будуць ведаць пра яго па кнігах і карцінах. І сярод помнікаў нашага часу – творы мастакоў Паплаўскіх, у якіх адлюстравана жыццё з яго радасцямі, смуткам, марамі.
Творчасць беларускага жывапісца, графіка, ілюстратара Георгія Паплаўскага – з'ява яркая і своеасаблівая ў нацыянальнай мастацкай культуры. Як мастак Паплаўскі сфарміраваўся ў атмасферы шасцідзесятых гадоў і назаўсёды захаваў вернасць праўдзіваму мастацтву, адкрытаму трывогам і надзеям свайго часу. Пафас і паэтыка таго пакалення наклалі глыбокі адбітак на лад жыцця, думак і адчуванняў майстра, на ўсю яго творчасць.
Свет мастака багаты, шматстайны і непадзельны. Ледзь пачуўшы кліч музы далёкіх падарожжаў, Паплаўскі зрываўся з абжытых месцаў. Ён пабачыў Кубу, Аўстралію, Мексіку, Сінгапур, Індыю і іншыя краіны, плаваў матросам у Атлантыку і Карыбскае мора, на рудавозах перасёк Арктыку. Старонкі гэтых падарожжаў можна ўбачыць у альбомах з яго жывапісам і графікай.
Асабліва душэўныя творы Георгія Паплаўскага нараджаліся ў вясковай майстэрні на Браслаўшчыне. Глыбокая і арганічная сувязь яднае мастака з беларускай зямлёй, яе гісторыяй, культурай, літаратурнымі традыцыямі, народнай творчасцю. У прысвечаны Беларусі раздзел экспазіцыі ўвайшлі лірычныя пейзажы роднага краю, партрэты людзей, карціны іх працоўнага жыцця з яго паэзіяй і прозай. Асаблівае месца адведзена кніжным ілюстрацыям. З незвычайным хваляваннем Паплаўскі ўвасобіў радкі Янкі Купалы і Якуба Коласа ў прадстаўленых на выставе графічных працах.
Характар творчага почырку Наталлі Паплаўскай склаўся пад уплывам беларускага фальклору. Зварот да традыцый нацыянальнай культуры, цікавасць да гісторыі, этнаграфіі і фальклору знайшлі адлюстраванне ў яркай метафарычнасці, асаблівай цеплыні выявы, эмацыянальнай насычанасці мастацкіх вобразаў. Наталля Паплаўская стварыла ілюстрацыі для многіх беларускіх казак, а таксама дзіцячых кніг. Асаблівым зачараваннем надзелены вядомыя літаграфіі “Дзядок”, “Залатая яблынька” і іншыя працы мастачкі.
Экспазіцыя ў немалой ступені адлюстроўвае той значны ўклад, які ўнеслі Паплаўскія ў развіццё беларускага выяўленчага мастацтва. Іх імёны сімвалізуюць высокі ўзровень майстэрства, індывідуальны стыль, а таксама сямейны творчы “клан”, дзе расце новае пакаленне графікаў. Усяго дэманструецца звыш 60 дакументаў, сярод якіх і арыгіналы работ з аўтографамі мастакоў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял пададзены аддзелам абслугоўвання спецыялізаванымі фондамі.
