З 1 сакавіка па 9 красавіка ў зале беларускай літаратуры (пам. 205) ладзіцца кніжная выстаўка “Свет хараства і працы”, прысвечаная 100-годдзю з дня нараджэння беларускага пісьменніка і перакладчыка Т.К. Хадкевіча (1912–1975).
Член Саюза пісьменнікаў Беларусі (1947), заслужаны работнік культуры Беларусі (1972), Тарас Канстанцінавіч Хадкевіч за сваю творчую працу быў узнагароджаны ордэнамі Працоўнага Чырвонага Сцяга, “Знак Пашаны” і медалямі. Яго імем названы Цэнтральная раённая бібліятэка ў Верхнядзвінску і вуліца ў Полацку.
Творчасці Т. Хадкевіча ўласціва рэалістычнае адлюстраванне рэчаіснасці, узнёсласць пачуццяў. Асноўнымі тэмамі яго твораў з`яўляюцца гісторыя і развіццё Беларусі і сталіцы, жыццё і людзі калгаснай вёскі, новабудоўляў, любімыя родныя краявіды.
На выстаўцы прадстаўлены творы пісьменніка – плён шматгадовай і шматграннай творчай дзейнасці. Дапаўняюць экспазіцыю публікацыі пра лёс аўтара і мастацкія вобразы, якія ім створаны.
У раздзеле “Зачараваны красою Наддзвіння” экспануюцца выданні кніг Т. Хадкевіча на мове арыгіналу. Сярод іх – “Выбранае” (1970), “Творы” ў 2 т. (1982), адзіны зборнік яго паэзіі “Смялей, таварыш!” (1932), шматлікія выданні аповесцей і апавяданняў: “Братэрства” (1948 ), “Вяснянка” (1949), “Рэха ў гарах” (1951), “Сяброўства” (1952), “Сад у квецені” (1966), “Дзвіна пайшла” (1968), “Крынічка” (1983, 1990), “Братэрства. Рэха ў гарах. Вяснянка” (1987), раманы “Даль палявая” (1959, 1972), “Песня Дзвіны” (1975) і іншыя творы.
Працягвае экспазіцыю шэраг нарысаў, брашур, альбомаў і кніг, прысвечаных гісторыі і тагачаснаму стану Савецкай Беларусі і Мінска. Некаторыя з іх напісаны ў суаўтарстве Т. Хадкевіча з іншымі пісьменнікамі.
Не абмінуў увагай пісьменнік і дзяцей, ім ён прысвяціў некалькі зборнікаў апавяданняў.
Публікацыі твораў Т. Хадкевіча, змешчаныя ў шматлікіх часопісах і калектыўных зборніках, прадстаўлены ў раздзеле “Улюбёны ў лясы і сонца”.
Асаблівай ўвагі заслугоўвае раздзел “Пісьменнік і яго героі”, дзе шырока экспануюцца кнігі Тараса Канстанцінавіча, выдадзеныя ў перакладах на мовы свету – рускую, украінскую, армянскую і інш.
Раздзел “Літаратура і жыццё” прадстаўляе пісьменніка яшчэ як рэдактара, складальніка, перакладчыка. Сярод шматлікіх экспанатаў ёсць перакладзеныя Т. Хадкевічам на беларускую мову творы М. Горкага, М. Твэна і інш.
З біяграфічнымі звесткамі з жыцця Тараса Канстанцінавіча, змешчанымі ў энцыклапедычных і даведачных выданнях, рэцэнзіямі на яго творы і іншымі крытычнымі публікацыямі даследчыкаў яго творчасці можна пазнаёміцца ў раздзеле “Само жыццё, як рака…”. Сярод даследчыкаў – Я. Герцовіч, І. Шамякін, С. Кухараў, Ю. Канэ, Г. Шупенька, А. і Ю. Русецкія, В. Бароўка і інш.
У раздзеле экспануюцца вершаваныя прысвячэнні Т. Хадкевічу, якія яму адрасавалі сябры – паэты А. Астрэйка і М. Калачынскі.
У экспазіцыі больш за 250 дакументаў. Выстаўка ілюстравана партрэтамі Т.К. Хадкевіча розных гадоў.
Кантактны тэлефон: 293-27-16.