З 2 сакавіка па 1 красавіка ў аддзеле абслугоўвання афіцыйнымі дакументамі (пам. 207) дэманструецца выстаўка “Свет дзікай прыроды: выратаваць і захаваць”, прысвечаная Сусветнаму дню дзікай прыроды.

Гэты Дзень – адно з самых маладых свят у календары ААН. Ён быў абвешчаны 20 снежня 2013 года на 68-й сесіі Генеральнай Асамблеі Арганізацыі Аб’яднаных Нацый (рэзалюцыя A/RES/68/205) і штогод адзначаецца 3 сакавіка. Дата была абрана не выпадкова – у гэты дзень у 1973 годзе была прынята Канвенцыя аб міжнародным гандлі відамі дзікай фаўны і флоры, якія знаходзяцца пад пагрозай знікнення. Дакумент іграе важную ролю ў рэгуляванні міжнароднага гандлю відамі, што знікаюць.

На працягу тысячагоддзяў народы і культуры разлічвалі на багатую прыродную разнастайнасць дзікіх раслін і жывёл у плане атрымання харчу, адзежы, лекаў і духоўнай падтрымкі. Дзікая прырода застаецца неад’емнай часткай будучыні нашай планеты дзякуючы таму, што яе практычная каштоўнасць арганічна спалучаецца з экалагічнымі, генетычнымі, сацыяльнымі, эканамічнымі, навуковымі, адукацыйнымі, культурнымі, рэкрэацыйнымі і эстэтычнымі аспектамі ўстойлівага развіцця і дабрабыту людзей.

Аднак, нягледзячы на бясспрэчнае значэнне для чалавецтва, дзікая прырода знаходзіцца пад пагрозай – некаторыя віды раслін і жывёл могуць проста знікнуць на зямлі. Адной з галоўных прычын з’яўляецца страта асяроддзя пасялення. Шмат у чым віной таму – актыўная дзейнасць чалавека, якая губіць прыродныя сістэмы і іх насельнікаў. Празмернае выкарыстанне прэснай вады, энергетычных рэсурсаў, масавая высечка лесу, сучасныя метады вядзення сельскай гаспадаркі і іншыя віды дзейнасці чалавека аказваюць разбуральнае ўздзеянне на навакольнае асяроддзе, прыводзячы да скарачэння разнастайнасці жывёл і раслін. Кожны дзень на Зямлі знікае каля 100 відаў жывых арганізмаў. На сённяшні дзень пад пагрозай знікнення знаходзяцца больш за 7 тысяч відаў жывёл і амаль 60 тысяч відаў раслін.

Акрамя страты асяроддзя пасялення, свету дзікай прыроды ўсё больш пагражаюць такія праблемы, як незаконны гандаль відамі флоры і фаўны і браканьерства, якія няспынна ўзрастаюць, а з-за імкнення да маментальнай нажывы штогод знішчаюцца неацэнныя насельнікі дзікай прыроды.

Сусветны дзень дзікай прыроды дае магчымасць звярнуць увагу на разнастайнасць і прыгажосць дзікай фаўны і флоры, а таксама садзейнічае павышэнню ўзроўню інфармаванасці аб рэальнай карысці, якую атрымлівае чалавек у выніку заняткаў прыродаахоўнай дзейнасцю. Акрамя таго, гэты Дзень нагадвае нам пра настойлівую неабходнасць узмацнення барацьбы супраць злачынстваў у адносінах да дзікай прыроды, што маюць сур’ёзныя эканамічныя, экалагічныя і сацыяльныя наступствы.

Праблема захавання свету дзікай прыроды займае важнае месца ў экалагічнай палітыцы Рэспублікі Беларусь, дзе прыняты і ўступілі ў дзеянне законы “Аб ахове навакольнага асяроддзя”, “Аб раслінным свеце”, “Аб свеце жывёл”, шэраг іншых нарматыўных прававых дакументаў, закліканых забяспечыць прававую і эканамічную аснову захавання і ўстойлівага выкарыстання біялагічнай разнастайнасці.

На выстаўцы прадстаўлена звыш 100 дакументаў на рускай і англійскай мовах: кнігі, брашуры, перыядычныя выданні, буклеты.

Экспазіцыя змяшчае наступныя тэматычныя раздзелы:

Дзікія жывёлы, рэдкія і віды жывёл, што знікаюць.
Дзікарослыя расліны, рэдкія і віды раслін, што знікаюць.
Ахова свету жывёл і раслін.
Міжнародныя прававыя дакументы па абароне дзікай прыроды.
Чырвоныя кнігі.
Экалагічная этыка.
Развіццё і падтрыманне асабліва ахоўных прыродных тэрыторый (запаведнікаў, нацыянальных паркаў, заказнікаў і інш.).
Дзікая прырода Рэспублікі Беларусь.

Выстаўка будзе цікавая біёлагам, заолагам, эколагам, спецыялістам у галіне лясной гаспадаркі, прыродакарыстання і аховы навакольнага асяроддзя, навуковым работнікам, аспірантам, студэнтам, а таксама ўсім, хто цікавіцца праблемай захавання дзікай прыроды і біялагічнай разнастайнасці нашай планеты.

Карысныя спасылкі

Дакументы

Дадатковыя рэсурсы

Свет дзікай прыроды: выратаваць і захаваць

Інфармацыйныя рэсурсы

Паслугі