З 2 мая па 26 чэрвеня ў зале перыядычных выданняў (пам. 106) праходзіць тэматычная выстаўка “Свет без шкодных звычак”.
Эвалюцыя забяспечыла арганізм чалавека невычэрпнымі рэзервамі трываласці і надзейнасці, а прырода стварыла яго для доўгага і шчаслівага жыцця. Але рэалізацыя магчымасцей, закладзеных у чалавеку, залежыць ад яго ладу жыцця, паўсядзённых паводзін, звычак, уменняў разумна распараджацца здароўем на карысць сабе, сваёй сям’і і дзяржаве.
Шэраг звычак, якія чалавек набывае яшчэ ў школьныя гады і ад якіх потым не можа пазбавіцца на працягу ўсяго жыцця, сур’ёзна шкодзяць яго здароўю. Яны хутка расходуюць увесь патэнцыял магчымасцей чалавека, спрыяюць заўчаснаму старэнню і набыццю ўстойлівых захворванняў. Прадстаўленыя на выстаўцы публікацыі ў часопісах “Семейный доктор”, “Воспитание школьников”, “Медицинский вестник”, газетах “Знамя юности”, “Медицинский вестник” і іншых перыядычных выданнях раскажуць наведвальнікам пра згубны ўплыў на здароўе чалавека курэння, ужывання алкаголю і наркотыкаў.
Не менш небяспечныя і распаўсюджаныя звычкі, якія прыносяць масу непрыемнасцей і складанасцей і негатыўна ўплываюць на працу арганізма чалавека, – харчовыя звычкі. Праблемам пераядання і залішняй вагі, буліміі і анарэксіі прысвечаны артыкулы з часопісаў “Женское здоровье”, “Здаровы лад жыцця” і “Вопросы организации и информатизации здравоохранения”.
Часам мы нават не падазраём, што нашы прыхільнасці і звычайныя ўчынкі – шлях да самаразбурэння. Пракрастынацыя і пазбяганне ўсеагульнай увагі, шопагалізм, брыдкаслоўе і плёткі становяцца крыніцай непатрэбных перажыванняў. З распаўсюджанымі псіхалагічнымі шкоднымі звычкамі пазнаёмяць перыядычныя выданні “Алеся”, “Psychologies” і “Выхаванне і дадатковая адукацыя”.
“В мире науки”, “Адукацыя і выхаванне”, “Педагогическая наука и образование” і іншыя часопісы закранаюць пытанне інтэрнэт-залежнасці, якая сёння становіцца ў адзін шэраг з наркаманіяй, курэннем і алкагалізмам.
Усяго на выстаўцы прадстаўлена каля 40 перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 87.
Матэрыял прадастаўлены аддзелам абслугоўвання спецыялізаванымі фондамі.
