З 11 чэрвеня па 27 ліпеня ў зале беларускай літаратуры (пам. 205) праходзіць юбілейная выстаўка “Сувязны паміж мінулым і будучым”, прысвечаная 90-годдзю з дня нараджэння народнага пісьменніка Беларусі Васіля Быкава.
Імя беларускага празаіка, драматурга, публіцыста, грамадскага дзеяча Васіля Уладзіміравіча Быкава (1924–2003) шырокавядомае не толькі ў нашай краіне, але і далёка за яе межамі. Аповесці “Альпійская балада”, ”Мёртвым не баліць”, “Сотнікаў”, “Абеліск”, “Дажыць да світання”, “Пайсці і не вярнуцца” паставілі пісьменніка ў адзін шэраг з выдатнымі майстрамі ваеннай прозы ХХ ст.
У аснове яго творчай манеры – суровая праўда адлюстравання вайны, яе драматычных і трагічных сітуацый, пільная ўвага да думак і пачуццяў чалавека, дэмакратызм і абвостраная чалавечнасць, філасофская насычанасць і выразнасць апавядальнай манеры. Пісьменнік, больш вядомы як аўтар ваеннай прозы, у 1990-я гг. звярнуўся да апісання і іншых гістарычных перыядаў Беларусі.
На выстаўцы экспануецца больш за 300 дакументаў, якія знаёмяць з творчай спадчынай Васіля Быкава – прозай, публіцыстычнымі артыкуламі, мемуарамі, п’есамі. Тут прадстаўлены творы “Жураўліны крык” (1960), “Трэцяя ракета” (1962, Літаратурная прэмія імя Я. Коласа ў 1964), “Альпійская балада” (1964), “Абеліск” (1972, разам з аповесцю “Дажыць да світання”, 1973, – Дзяржаўная прэмія СССР у 1974), “Воўчая зграя” (1975, разам з аповесцю “Яго батальён”, 1975, – Дзяржаўная прэмія БССР імя Я. Коласа ў 1978), “Знак бяды” (1984, Ленінская прэмія ў 1986) і іншыя, у якіх пісьменнік звяртаецца да тэмы партызанскай і падпольнай барацьбы беларускага народа ў гады Вялікай Айчыннай вайны.
Асобным раздзелам экспануюцца творы Васіля Быкава ў перакладах на рускую, украінскую, англійскую, нямецкую і іншыя мовы. Яго творы друкаваліся больш чым на 50 мовах. Тут можна пазнаёміцца з перакладамі пісьменнікам сваіх твораў на рускую мову.
Пісьменнік працаваў і ў галіне драматургіі кіно, тэатра. Па яго сцэнарыях выйшлі кінафільмы “Трэцяя ракета” (1963), “Альпійская балада” (1966), “Яго батальён” (1988) і інш. У 2012 г. па аповесці Васіля Быкава “У тумане” рэжысёрам С. Лазніцам быў пастаўлены мастацкі фільм, які на 65-м Канскім фестывалі быў адзначаны спецыяльным прызам. На выстаўцы прадстаўлены кінасцэнарыі да твораў пісьменніка.
Апошні раздзел экспазіцыі знаёміць з публікацыямі, змешчанымі ў энцыклапедычных выданнях, зборніках крытыкі і часопісах, а таксама з кнігамі літаратурных крытыкаў С. Шапрана, Г. Бураўкіна, В. Локун, Л. Лазарава і іншымі, якія раскрываюць жыццё і творчасць таленавітага пісьменніка.
Кантактны тэлефон: (8 017) 293 27 16.
 |
 |
 |
 |
 |
 |
 |
 |
 |
 |
 |
 |
