З 22 сакавіка па 23 красавіка ў зале беларускай літаратуры (пам. 205) праходзіць выстаўка “Сусвет дабрыні”, прымеркаваная да 70-годдзя выдатнага беларускага пісьменніка, сцэнарыста, лаўрэата Дзяржаўнай прэміі Рэспублікі Беларусь (2002), Нацыянальнай літаратурнай прэміі (2015) Уладзіміра Пятровіча Саламахі.
Экспазіцыя знаёміць наведвальнікаў са шматлікімі зборнікамі празаіка: першай кнігай “На ўзмежку радасці”, кнігамі апавяданняў і аповесцей “Заўтра ў дарогу”, “Кавалёк – лесавая былінка”, “Цяпло чужога сэрца”, “Прывід у скураным крэсле”, “Апазнаецца асоба мужчыны…”, “І няма шляху чужога”, “Сустрэчы без расставанняў” і інш. Творы Уладзіміра Саламахі друкуюцца ў часопісах “Полымя”, “Маладосць”, “Нёман”, “Работніца і сялянка”, “Наш современник”.
Плённа працуе аўтар і ў галіне крытыкі і літаратуразнаўства, пра што сведчаць прадстаўленыя на выстаўцы кнігі “Званыя і выбраныя”, “Сусвет дабрыні”, “Літаратура: застаецца сапраўднае”, а таксама прадмовы да кніг С. Квіткевіча, У. Гаўрыловіча, І. Сяргейчыка, Т. Цвіркі і інш., артыкулы ў часопісах “Полымя” розных гадоў.
Дапаўняюць экспазіцыю матэрыялы пра жыццёвы і творчы шлях юбіляра.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял прадастаўлены аддзелам абслугоўвання спецыялізаванымі фондамі.
