З 19 лютага па 11 сакавіка ў зале беларускай літаратуры (пам. 205) праходзіць выстаўка “Сугучча фарбаў”, прысвечаная 75-годдзю з дня нараджэння Іосіфа Уладзіміравіча Скурко (1938–1989).
Матэрыялы разгорнутай экспазіцыі расказваюць пра літаратурную спадчыну і адлюстроўваюць творчы партрэт таленавітага беларускага паэта, кінадраматурга і перакладчыка.
Творы І. Скурко напісаны ў розных жанрах, але найбольшае месца займаюць лірычныя. Яго паэзія прасякнута грамадзянскім пафасам, любоўю да роднага краю. Яе вылучае мілагучнасць і меладычнасць. Менавіта таму, многія вершы паэта пакладзены на музыку сучаснымі беларускімі кампазітарамі У. Буднікам, І. Лучанком, К. Цесаковым, Р. Буцвілоўскім і сталі добра вядомымі песнямі – “Святло тваіх вачэй”, “Бацькоўскі парог”, “Верасы”, “Свіцязянка”, “Ластаўка “ і інш.
Цэнтральнае месца ў экспазіцыі займаюць кнігі “Бацькоўскі парог” (1973) і “Весніцы” (1990), якія сведчаць пра шчодры талент паэта. Асобна прадстаўлены шматлікія публікацыі яго твораў у часопісах і калектыўных зборніках, аб’яднаныя ў раздзеле “Невычэрпнае багацце”.
Іосіф Уладзіміравіч плённа працаваў у галіне перакладу з польскай, рускай і ўкраінскай моў. На беларускую мову ім былі перакладзены асобныя творы В. Бокава, Б. Кежуна, А. Твардоўскага, М. Нагнібеды і інш. З плёнам яго перакладчыцкай дзейнасці знаёміць раздзел “З адзнакаю лірычнасці”.
Энцыклапедычныя выданні і публікацыі, змешчаныя ў раздзеле “Майстар паэтычнага слова”, больш падрабязна апавядаюць пра жыццёвы і творчы лёс паэта.
Кантактны тэлефон: (8 017) 293 27 16.