З 13 верасня па 7 кастрычніка ў Нацыянальнай бібліятэцы Беларусі (3-ці паверх, кальцавы калідор) працуе тэматычная выстаўка “Сучасныя бібліятэчныя тэхналогіі”, прымеркаваная да Дня бібліятэк (15 верасня).
На працягу стагоддзяў роля і абавязкі бібліятэк заставаліся непахіснымі. Бібліятэкі былі выключнымі банкамі для захавання ведаў і інфармацыі. Намагаючыся не адставаць ад часу, яны ўдасканальваюцца ў абслугоўванні чытачоў і выкарыстоўваюць сучасныя інфармацыйныя тэхналогіі, якія не толькі ствараюць умовы для канкурэнцыі паміж бібліятэкамі свету і Сусветнай павуцінай, але і прадстаўляюць новыя магчымасці для бібліятэчна-бібліяграфічнай дзейнасці.
Паказаць месца і палажэнне бібліятэк у новым інфармацыйным асяроддзі дапаможа тэматычная кніжная выстаўка “Сучасныя бібліятэчныя тэхналогіі”, на якой прадстаўлена літаратура аб навейшых сусветных інфармацыйных распрацоўках, якія прымяняюцца ў бібліятэчнай дзейнасці, айчынным і замежным вопыце ўваходжання бібліятэк у лічбавую эру. На выстаўцы прадстаўлена каля 150 дакументаў апошніх гадоў выдання на рускай, беларускай, англійскай, французскай і нямецкай мовах.
Экспазіцыя складаецца з дзесяці раздзелаў: “Бібліятэка ў інфармацыйным грамадстве”, “З мінулага ў будучыню…”, “WEB-тэхналогіі ў бібліятэчнай справе”, “Лічбавыя бібліятэкі”, “Інфармацыйнае абслугоўванне”, “Камплектаванне бібліятэчнага фонду і каталагізацыя”, “Бібліятэкі і адукацыя”, “Бібліятэчная прафесія”, “Замежны вопыт у бібліятэчнай справе”, “Місія бібліятэк”. У кнігах раскрываецца месца і роля бібліятэк ў інфармацыйным грамадстве, паказваецца гісторыя іх стварэння і развіцця, распавядаецца пра выкарыстанне інтэрнэт-рэсурсаў у бібліятэчнай справе, лічбавыя бібліятэкі і алічбоўку бібліятэчных фондаў, інавацыі ў інфармацыйным абслугоўванні карыстальнікаў і бібліятэчных працэсах, замежныя бібліятэкі і іх вопыт.
Матэрыялы экспазіцыі, несумненна, выклікаюць зацікаўленасць спецыялістаў і будуць карыснымі прадстаўнікам розных кірункаў бібліятэчнай дзейнасці, якія імкнуцца да перманентнай кампетэнтнасці і прафесійнай запатрабаванасці.
Кантактныя тэлефоны: (8 017) 293 29 80, 293 28 86.
 |
 |
 |
 |
 |
 |
 |
 |
 |
