З 13 па 31 студзеня ў зале беларускай літаратуры (пам. 205) ладзіцца юбілейная кніжная выстаўка “Струны шчодрага таленту”, прысвечаная 75-годдзю з дня нараджэння пісьменніка, перакладчыка Янкі (Івана Данілавіча) Сіпакова.
Творчасць заслужанага дзеяча культуры Беларусі Янкі Сіпакова прадстаўлена ў беларускай літаратуры дзясяткамі зборнікаў паэзіі: “Сонечны дождж” (1960), “Дзень” (1968), “У поўдзень, да вады” (1976), “Вочы ў вочы” (1978), “Вершы, балады, прытчы” (2010) і інш. Паэтычнай вяршыняй Я. Сіпакова стала паэма “Веча славянскіх балад” (1973), якая была адзначана Дзяржаўнай прэміяй Беларусі імя Янкі Купалы (1976). У ёй аўтар стварыў паэтычную карціну гісторыі славянскіх народаў – ад часу ўзнікнення славян да XX ст., знайшоўшы для ўсіх, нават такіх нешматлікіх народаў, як кашубы і лужычы, яркія выразныя колеры.
Плённа працуе Я. Сіпакоў таксама і ў “малой” прозе, да якой звярнуўся яшчэ ў пачатку свайго творчага шляху, заявіўшы пра сябе спачатку як пра гумарыста – “Лысы юбілей” (1965), “Плюс на мінус” (1973), потым – як пра аўтара аповесцей, нарысаў, эсэ, прытчаў, метафар. У апошнія гады Іван Данілавіч працуе ў жанры “дзённіка настрою” – “Наталенне смагі” (2007), “Шукаючы спакой у мітусні” (Маладосць. 2009. № 3–5).
Янка Сіпакоў “…здолеў скласці оду беларускаму агароду, гімн беларускай хаце, усяму роднаму краю…”, – так яскрава адзначыла літаратуразнаўца Вольга Шынкарэнка ўклад пісьменніка ў беларускую літаратуру, сказаўшы пра адну з яго апошніх кніг – “Зялёны лісток на планеце Зямля”. Гэтыя словы ў поўнай меры адносіцца і да ўсёй творчасці паэта і пісьменніка.
Выстаўка мае чатыры раздзелы, у якіх прадстаўлены творчая спадчына пісьменніка, пераклады твораў іншых паэтаў, выкананыя Я. Сіпаковым, літаратура пра жыццё і творчы шлях юбіляра.
Кантактны тэлефон: 293-27-16.
 |
 |
|||||
 |
 |
