Кніжна-ілюстрацыйная выстаўка “Спорт. Складальнікі перамог” адкрыта ў межах выставачнага праекта “Беларусь спартыўная”, прымеркаванага да ІІ Еўрапейскіх гульняў.
Спорт – арганізаваная па вызначаных правілах дзейнасць людзей, якая падразумявае супастаўленне іх фізічных і інтэлектуальных здольнасцей, а таксама падрыхтоўка да гэтай дзейнасці і міжасобасныя адносіны, што ўзнікаюць у яе працэсе. Звычайна спорт уяўляе сабой спецыфічны род фізічнай або інтэлектуальнай актыўнасці, якая здзяйсняецца з мэтай спаборніцтва, а таксама паляпшэння здароўя, атрымання маральнага і матэрыяльнага задавальнення, імкнення да дасканаласці і славы.
Першы раздзел выстаўкі “Навука перамагаць” змяшчае навуковыя, навукова-метадычныя выданні па эканоміцы, адміністраванні, культуры спорту. У раздзеле таксама сабраны кнігі па спартыўнай медыцыне, спартыўным харчаванні, псіхалагічнай і фізічнай падрыхтоўцы спартсменаў да вышэйшых дасягненняў.
Назва наступнага раздзела экспазіцыі – “Кніга-трэнер” – гаворыць сама за сябе. Акрамя аднайменнай калекцыйнай кніжнай серыі, у ім прадстаўлены добра ілюстраваныя выданні з правіламі, праграмамі фізічнай падрыхтоўкі, стратэгіямі і тактыкай авалодання такімі відамі спорту, як футбол, хакей, бег, плаванне, тэніс, гольф і інш. Прадстаўлены і аўтарскія трэніровачныя методыкі.
Назвай цэнтральнага раздзела стала вядомая цытата “О, спорт! Ты – свет!” ініцыятара арганізацыі сучасных Алімпійскіх гульняў П’ера дэ Кубертэна. У раздзеле сабраны матывацыйныя цытаты і кнігі вядомых асоб – спартсменаў, філосафаў, паэтаў, пісьменнікаў – пра волю, дух, імкненне да перамог, карысць фізічных нагрузак.
Таксама наведвальнікі атрымаюць магчымасць убачыць фотаздымкі сапраўднай легенды спартыўнай фатаграфіі Льва Барадуліна і мастацкую работу ў стылі pop-up book навучэнца Мінскай дзяржаўнай гімназіі-каледжа мастацтваў А. Войціка з выявай часткі галоўнага праспекта Мінска.
Апошні раздзел выстаўкі “Гісторыі пра спорт” змяшчае тэматычныя навукова-папулярныя, біяграфічныя і літаратурна-мастацкія выданні пра Алімпійскія гульні, вядомых спартсменаў і асобныя віды спорту. Прадстаўлены серыі “Библиотека спортивной прозы” і “Спорт и личность”.
Развіццё і змена спорту на працягу чалавечай гісторыі можа шмат распавесці як пра сацыяльныя змены ў грамадстве наогул, так і пра сутнасць спорту ў прыватнасці.
Выстаўка размешчана на 2-м паверсе кальцавога калідора і будзе доўжыцца з 30 красавіка да 31 студзеня 2020 г.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 29 80.
Матэрыял прадастаўлены аддзелам галерэйна-выставачнай дзейнасці.
