З 1 красавіка па 30 чэрвеня ў зале прававой інфармацыі (пам. 207b) арганізавана тэматычная выстаўка “Спорт і права”, падрыхтаваная да чэмпіянату свету па хакеі ў Мінску.
Спорт на сённяшні дзень – масавая з'ява, папулярнае відовішча, залог росквіту нацыі. Таму ў шматлікіх краінах спартыўная дзейнасць з'яўляецца састаўной часткай палітыкі, стратэгіі развіцця нацыі. Вядзенне здаровага ладу жыцця, павышэнне яго працягласці ў развітых дзяржавах за апошнія некалькі дзесяцігоддзяў абумоўлена ўвагай да спорту, фізічнай культуры. У пачатку ХХІ стагоддзя спорт становіцца і вельмі прыбытковым бізнесам. Сучасны спорт развіваецца ў своеасаблівым трохкутніку “дзяржава – бізнес – спорт”. З дзяржаўнага пункта гледжання, спорт сёння – гэта найважнейшы элемент палітыкі, надзейны і эфектыўны інструмент ідэалогіі.
Асноўным нарматыўна-прававым актам, які рэгламентуе спартыўную галіну ў Рэспублікі Беларусь, з'яўляецца Закон Рэспублікі Беларусь ад 18 чэрвеня 1993 г. № 2445-ХII “Аб фізічнай культуры і спорце”. Ён вызначае найбольш важныя пытанні арганізацыі спартыўнай дзейнасці, акрэслівае дзяржаўную палітыку ў сферы фізічнай культуры і спорту, вылучае паўнамоцтвы Нацыянальнага алімпійскага камітэта і федэрацый па відах спорту.
Заканадаўцамі Рэспублікі Беларусь прыняты шэраг актаў, якія сцвярджаюць парадак спансіравання спорту, прысваення ўзнагарод і іншых заахвочванняў за дасягненні выдатных вынікаў у спорце, узвядзенне спартыўных будынкаў і комплексаў і інш. На сённяшні дзень распрацаваны праект Спартыўнага кодэкса Рэспублікі Беларусь, які ўключае больш за 150 артыкулаў. Яго прыняцце будзе спрыяць забеспячэнню сістэмнага і лагічна паслядоўнага прававога рэгулявання адносін у сферы спорту і фізічнай культуры.
Міжнародныя спартыўныя прававыя адносіны з'яўляюцца прадметам вывучэння галіны, якая фарміруецца, – спартыўнага права і асобна міжнароднага спартыўнага права. З развіццём спорту ўвага да гэтых праваадносін, іх нарматыўнага рэгулявання і развіцця будзе ўзрастаць.
Экспазіцыя налічвае каля 50 дакументаў: кнігі, брашуры, перыядычныя выданні.
Выстаўка ўключае наступныя тэматычныя раздзелы:
- Міжнароднае спартыўнае права.
- Спартыўнае права: паняцце, тэрміны і перспектывы.
- Прававое рэгуляванне асобных відаў спорту.
- Працоўныя і грамадзянска-прававыя адносіны ў спорце.
- Прававое рэгуляванне барацьбы з допінгам у спорце.
- Злачыннасць у спорце.
Рэкамендуецца навуковым супрацоўнікам, выкладчыкам, аспірантам і студэнтам юрыдычных і спартыўных ВНУ, а таксама ўсім, хто цікавіцца спортам.
 |
 |
 |
