З 6 снежня па 3 студзеня ў аддзеле абслугоўвання афіцыйнымі дакументамі (пам. 207) адкрыта выстаўка “СНД: супрацоўніцтва і ўзаемадзеянне ў мэтах развіцця”, прымеркаваная да 20-годдзя ўтварэння СНД.
Садружнасць Незалежных Дзяржаў (СНД) – гэта рэгіянальная міждзяржаўная арганізацыя, галоўнай мэтай якой з’яўляецца супрацоўніцтва ў палітычнай, эканамічнай, экалагічнай, гуманітарнай, культурнай і іншых галінах паміж шэрагам краін, якія раней уваходзілі ў склад СССР.
СНД была заснавана 8 снежня 1991 года. У гэты дзень кіраўнікамі БССР, РСФСР і Украіны ў Віскулях пад Брэстам (Рэспубліка Беларусь) было падпісана Пагадненне аб стварэнні Садружнасці Незалежных Дзяржаў. Удзельнікі Пагаднення канстатавалі, што Саюз ССР як суб’ект міжнароднага права і геапалітычная рэальнасць спыняе сваё існаванне. 21 снежня 1991 года ў Алма-Аце быў падпісаны Пратакол да Пагаднення “Аб стварэнні Садружнасці Незалежных Дзяржаў”. У дакуменце было зафіксавана, што 11 дзяржаў, уключаючы Рэспубліку Беларусь, на раўнапраўных пачатках утвараюць Садружнасць Незалежных Дзяржаў. Таксама было падпісана Пагадненне “Аб каардынацыйных інстытутах Садружнасці Незалежных Дзяржаў”. Паводле гэтага дакумента, для рашэння пытанняў, звязаных з каардынацыяй дзейнасці дзяржаў Садружнасці ў сферы агульных інтарэсаў, быў створаны найвышэйшы орган Садружнасці – Савет кіраўнікоў дзяржаў, а таксама Савет кіраўнікоў урадаў.
22 студзеня 1993 года ў Мінску быў прыняты асноўны дакумент арганізацыі – Статут Садружнасці Незалежных Дзяржаў. Паводле Статута, Садружнасць не з’яўляецца дзяржавай і не валодае наднацыянальнымі паўнамоцтвамі. Яна заснавана на пачатках суверэннай роўнасці ўсіх яе членаў, кожны з якіх з’яўляецца самастойным і раўнапраўным суб’ектам міжнароднага права.
Асноўнымі мэтамі арганізацыі з’яўляюцца:
- ажыццяўленне супрацоўніцтва паміж дзяржавамі-членамі ў палітычнай, эканамічнай, прававой, культурнай, экалагічнай, гуманітарнай і іншых галінах, супрацоўніцтва ў справе забеспячэння міжнароднага міру і бяспекі, а таксама дасягнення раззбраення;
- стварэнне агульнай эканамічнай прасторы, забеспячэнне міждзяржаўнай кааперацыі і інтэграцыі ў інтарэсах усебаковага і збалансаванага эканамічнага і сацыяльнага развіцця дзяржаў-членаў;
- узаемадапамога ў мэтах стварэння мірных умоў жыцця народаў, калектыўнай бяспекі;
- мірнае вырашэнне спрэчак і канфліктаў паміж краінамі-ўдзельніцамі;
- садзейнічанне грамадзянам дзяржаў-членаў у свабодных зносінах, кантактах і перамяшчэнні па тэрыторыі краін, якія ўваходзяць у Садружнасць.
Адносіны паміж дзяржавамі – членамі СНД заснаваны на прынцыпах павагі суверэнітэту, самавызначэння і тэрытарыяльнай цэласнасці краін і неўмяшання ў іх знешнюю палітыку і ўнутраныя справы, непарушнасці існуючых меж, непрымянення сілы і вырашэння спрэчак мірнымі сродкамі, а таксама вяршэнства міжнароднага права.
Сёлета СНД адзначае свой 20-гадовы юбілей. За гады існавання Садружнасць даказала дзеяздольнасць і працягвае захоўваць ролю ўнікальнай “пляцоўкі” для ўсебаковага міждзяржаўнага супрацоўніцтва. За 20 гадоў Садружнасць зацвердзілася як унікальная рэгіянальная міждзяржаўная арганізацыя і механізм узаемадзеяння ў рашэнні ключавых пытанняў развіцця дзяржаў, якія ў яе ўваходзяць, уключаючы эканоміку, бяспеку, палітычнае і гуманітарнае супрацоўніцтва, міграцыю і развіццё кантактаў паміж грамадзянамі дзяржаў – удзельніц Садружнасці.
СНД удасканальвае свой патэнцыял і адкрывае новыя стратэгічныя магчымасці для супрацоўніцтва і ўзаемавыгаднай інтэграцыі. Далейшае развіццё і ўмацаванне Садружнасці адказвае жыццёвым інтарэсам народаў дзяржаў – удзельніц СНД, іх памкненням да міру і росквіту.
У экспазіцыі прадстаўлена звыш 100 дакументаў: кнігі, брашуры, перыядычныя выданні, буклеты.
Выстаўка ўключае наступныя тэматычныя раздзелы:
- СНД: гісторыя стварэння, асноўныя мэты і задачы.
- Міжпарламенцкае і палітычнае супрацоўніцтва.
- Эканамічнае і гандлёвае супрацоўніцтва.
- Супрацоўніцтва ў гуманітарнай і культурнай сферах.
- Супрацоўніцтва ў сферы барацьбы супраць злачыннасці і ўмацавання бяспекі.
- СНД і Рэспубліка Беларусь.
Выстаўка будзе цікавая эканамістам, палітолагам, прававедам, гісторыкам, сацыёлагам, кіраўнікам і прадстаўнікам дзяржаўных органаў, супрацоўнікам міжнародных, рэгіянальных і няўрадавых арганізацый, выкладчыкам сацыяльна-палітычных і эканамічных дысцыплін, студэнтам і аспірантам.
Карысныя спасылкі
- Афіцыйны сайт СНД
- Эканамічны суд Садружнасці Незалежных Дзяржаў
- Дзелавы цэнтр эканамічнага развіцця СНД
- Міждзяржаўны савет СНД па прамысловай бяспецы
- Міждзяржаўны статыстычны камітэт СНД
- Савет па супрацоўніцтве ў галіне ўтварэння дзяржаў – удзельніц СНД
- Антытэрарыстычны цэнтр дзяржаў – удзельніц СНД
- Рэгіянальная садружнасць у галіне сувязі
- Міждзяржаўны авіяцыйны камітэт
- Савет па стандартызацыі, метралогіі і сертыфікацыі
- Каардынацыйны савет па бухгалтарскім уліку пры Выканаўчым камітэце СНД
- Савет па справах моладзі дзяржаў – удзельніц СНД
- Міждзяржаўная сетка інфармацыйна-маркетынгавых цэнтраў
- Інфармацыйны партал міжрэгіянальнага прыгранічнага супрацоўніцтва
Дакументы
- Пагадненне аб стварэнні Садружнасці Незалежных Дзяржаў
- Статут Садружнасці Незалежных Дзяржаў
- Дагавор аб стварэнні Эканамічнага саюза
- Алма-Ацінская дэкларацыя дзяржаў – членаў СНД
- Заява кіраўнікоў дзяржаў – удзельніц Садружнасці Незалежных Дзяржаў у сувязі з 20-годдзем утварэння СНД
- Аналітычны даклад "Вынікі дзейнасці СНД за 20 гадоў і задачы на перспектыву"
- Канцэпцыя далейшага развіцця Садружнасці Незалежных Дзяржаў
- Стратэгія эканамічнага развіцця СНД на перыяд да 2020 года