З 10 кастрычніка па 12 лістапада ў зале беларускай літаратуры (пам. 205) праходзіць выстаўка “Словы, вобразы, пачуцці”, прымеркаваная да 80-годдзя Алены Рыгораўны Кобец-Філімонавай.
Алена Кобец-Філімонава – вядомая беларуская пісьменніца, перакладчыца, даследчыца беларускай мінуўшчыны і кінамастацтва. Піша на беларускай і рускай мовах, пераважна для дзяцей. У сваіх творах узнімае тэму любові да роднай зямлі, разглядае маральна-этычныя праблемы і праблемы экалогіі, вучыць дабрыні, сціпласці, працавітасці.
Літаратурная спадчына Алены Кобец-Філімонавай прадстаўлена на выстаўцы паэтычнымі зборнікамі “Казка пра месяц” (1963), “Залаты ручнік” (1972); аповесцямі “Жаваранкі над Хатынню” (1977), “Блакітны экспрэс” (1981); раманам “Агні за перавалам” (1987); зборнікамі казак “Читайка и Гуляйка” (1963), “Семь художников” (1965), “Сказки старого Янниса” (1969), “Вянок дзівосаў” (1986); кнігай нарысаў пра Грэцыю “В королевстве... но не сказочном” (1969); кнігай-споведдзю “Шлях да малітвы” (2004); дакументальнай аповесцю-эсэ “Распятая Хатынь” (2005); кнігай пра творчасць і жыццё Рыгора Кобеца “Калі ўцякала сонца” (2006), кнігай “Карэльскія Курапаты 1937–1938” (2007), а таксама творамі, уключанымі ў калектыўныя зборнікі і часопісы.
Экспазіцыя змяшчае творы пісьменніцы ў перакладзе на замежныя мовы, а таксама знаёміць з перакладамі А. Кобец-Філімонавай на беларускую мову твораў іншых аўтараў. Сярод іх – зборнік грэчаскага паэта Я. Рыцаса “Макронісас” (1973) і інш.
Дапаўняе экспазіцыю літаратура пра жыццё і творчасць вядомай пісьменніцы.
Кантактны тэлефон: (8 017) 293 27 16.
 |
 |
 |
 |
 |
 |
