З 20 жніўня па 30 верасня на кальцавым калідоры 3-га паверха ладзіцца кніжная выстаўка "Славутыя імёны Бацькаўшчыны", прысвечаная Дню ведаў і Дню беларускай пісьменнасці.
У гісторыі кожнай краіны самы адметны і значны след пакідаюць, як вядома, яе вялікія і знакамітыя асобы: уладары, асветнікі, гісторыкі, дойліды, пісьменнікі, мастакі, музыкі і іншыя выбітныя постаці.
Нацыянальная бібліятэка Беларусі напярэдадні двух значных свят прапануе выстаўку «Славутыя імёны Бацькаўшчыны», дзе прадстаўлена галерэя гістарычных асоб беларускай зямлі – сёлетніх юбіляраў. У 2010 годзе спаўняецца:
- 880 гадоў з дня нараджэння Кірылы Тураўскага, беларускага і ўсходнеславянскага царкоўнага дзеяча, пісьменніка-прапаведніка, беларускага праваслаўнага святога;
- 540 гадоў з дня нараджэння Міколы Гусоўскага, беларускага і польскага паэта-гуманіста, асветніка;
- 520 гадоў з дня нараджэння Францыска Скарыны, першадрукара, мысліцеля-асветніка, гуманіста, пісьменніка, мастака-графіка;
- 500 гадоў з дня нараджэння Івана Фёдарава, асветніка, заснавальніка кнігадрукавання ў Расіі і на Украіне, а таксама ў Заблудаўскай друкарні (Гродзенскі павет);
- 480 гадоў з дня нараджэння Сымона Буднага, дзеяча беларускай культуры, мысліцеля-гуманіста, філосафа, асветніка, рэлігійнага рэфарматара, філолага, паэта;
- 470 гадоў з дня нараджэння Васіля Цяпінскага, гуманіста-асветніка, пісьменніка, кнігавыдаўца, прадаўжальніка гуманістычных і культурна-асветніцкіх традыцый Ф. Скарыны;
- 425 гадоў з дня нараджэння Соф’і Слуцкай, рэлігійнай дзяячкі, асветніцы, беларускай праваслаўнай святой.
Усе гэтыя слаўныя імёны – гонар беларускай зямлі! Кожны з іх сваёй рознабаковай дзейнасцю закладваў падмурак беларускай нацыянальнай культуры, указваў на важную ролю асветы ў жыцці народа і падаваў выключны прыклад бескарыслівага служэння на гэтай ніве.
Выстаўка налічвае больш за 200 выданняў.
Кантактныя тэлефоны: 293-28-86, 293-29-80.