З 17 студзеня па 10 лютага ў зале выяўленчых і відэадакументаў (пам. 307) праходзіць выстаўка “Скарбы музея”, прысвечаная 75-годдзю з дня заснавання Нацыянальнага мастацкага музея Рэспублікі Беларусь.
Нацыянальны мастацкі музей быў заснаваны і адкрыты ў 1939 г. у Мінску як Дзяржаўная карцінная галерэя. Яе калекцыю ў той час складалі творы, сабраныя пасля грамадзянскай вайны ў першых музеях Мінска, Віцебска, Магілёва. Пад час Вялікай Айчыннай вайны вялікая частка экспанатаў была разграблена і знішчана. Пасляваеннае адраджэнне галерэі звязана са шматгадовай дзейнасцю яе другога дырэктара А.В. Аладавай, якая аддавала ўсе сілы для абнаўлення калекцыі. У 1957 г. карцінная галерэя пераязджае ў новы будынак і атрымлівае статут Дзяржаўнага мастацкага музея БССР.
Сёння Нацыянальны мастацкі музей (сучасная назва з 1993 г.) добра вядомы не толькі ў Беларусі, але і за яе межамі. У яго экспазіцыі, філіялах і сховішчах знаходзяцца шматлікія творы, якія складаюць разнастайныя калекцыі двух галоўных музейных збораў: нацыянальнага мастацтва і помнікаў мастацтва краін і народаў свету.
Акрамя пастаяннай экспазіцыі, музей прапаноўвае наведвальнікам маштабныя выставачныя праекты, сярод якіх значнае месца адведзена міжнародным.
Аснову экспазіцыі складаюць рэпрадукцыі, альбомы і паштоўкі з лепшымі творамі мастацтва, якія ўвайшлі ў зборы музея.
Шырока прадстаўлены даведачныя выданні, кнігі і артыкулы, якія расказваюць пра гісторыю музея і яго стваральнікаў М.П. Міхалапа, А.В. Аладаву, Ю.А. Карачуна, а таксама дзейнасць сённяшняга дырэктара музея У.І. Пракапцова.
Экспазіцыю складаюць звыш 60 дакументаў.
Кантактны тэлефон: (8 017) 293 27 58.
 |
 |
 |
 |
 |
 |
 |
 |
 |
 |
 |
 |
 |
 |
 |
