З 27 сакавіка па 28 мая ў зале прававой інфармацыі (пам. 207b) адкрыта тэматычная выстаўка “Сістэма аўтарскіх і сумежных праў у сучасным грамадстве”, прысвечаная Міжнароднаму дню інтэлектуальнай уласнасці.
Гэты Дзень быў прыняты генеральнай асамблеяй Сусветнай арганізацыі інтэлектуальнай уласнасці (САІУ) у верасні 2000 года і штогод адзначаецца 26 красавіка – у дзень уступлення ў сілу Канвенцыі, якая заснавала арганізацыю.
Аўтарскае права іграе ў жыцці сучаснага грамадства вельмі прыкметную ролю. Тут сфакусіраваны інтарэсы аўтараў твораў літаратуры, музыкі, выяўленчага мастацтва, кіно і камп’ютарных праграм, звычайных грамадзян, якія штодня выкарыстоўваюць гэтыя прадукты, і кампаній, якія зарабляюць на творчасці.
Эканамічная значнасць рэзультатаў інтэлектуальнай дзейнасці і сродкаў індывідуалізацыі патрабуе забеспячэння іх эфектыўнай прававой аховай. Лёгка заўважыць пастаяннае ўзмацненне ўвагі дзяржавы і грамадства да пытанняў рэгулявання адносін пры выкарыстанні аўтарскіх твораў.
Рэспубліка Беларусь не засталася ў баку ад сусветных працэсаў. За час яе існавання ў якасці суверэннай дзяржавы былі распрацаваны і прыняты законы "Аб аўтарскім праве і сумежных правах", "Аб таварных знаках i знаках абслугоўвання", "Аб патэнтах на вынаходніцтвы, карысныя мадэлі, прамысловыя ўзоры" і інш.
Наша краіна з’яўляецца ўдзельніцай шматбаковых міжнародных дагавораў, якія функцыянуюць пад эгідай Сусветнай арганізацыі інтэлектуальнай уласнасці, а таксама шэрагу шматбаковых міжнародных дагавораў, што былі заключаны ў рамках СНД, у галіне аховы прамысловай уласнасці, аўтарскага права і сумежных праў.
Улічваючы працэсы ўніфікацыі норм аўтарскага права розных дзяржаў, можна адзначыць тэндэнцыю да збліжэння ранейшых разнастайных норм і выказаць меркаванне пра фарміраванне з часам сістэмы адзінага аўтарскага заканадаўства сучаснай цывілізацыі.
У наш час назіраецца нізкі ўзровень выканання заканадаўства ў гэтай сферы, які шмат у чым выкліканы тым, што большасць стваральнікаў інтэлектуальнага прадукту не інфармаваны пра прыналежныя ім правы і магчымыя спосабы іх ажыццяўлення і аховы.
Выстаўка прызначана для навуковых работнікаў, выкладчыкаў, студэнтаў і аспірантаў юрыдычных ВНУ, выдаўцоў, аўтараў, бібліятэчных работнікаў, а таксама для ўсіх, хто цікавіцца актуальнай праблематыкай развіцця аўтарскага права і сумежных праў.
У экспазіцыі прадстаўлена больш за 70 дакументаў на рускай і іншых мовах: кнігі, брашуры, перыядычныя выданні.
Выстаўка змяшчае наступныя тэматычныя часткі:
- Зараджэнне і развіццё права аўтарства і права на недатыкальнасць твора.
- Міжнародныя дакументы, якія рэгламентуюць аўтарскае права.
- Канстытуцыйна-прававыя асновы рэгулявання інтэлектуальнай уласнасці ў Рэспубліцы Беларусь.
- Аўтарскае права ў выдавецкай дзейнасці і сродках масавай інфармацыі.
- Музычны твор як самастойны аб’ект аўтарскага права.
- Прававая абарона аўтарскіх праў у глабальным сеціве Інтэрнэт.
- Суд па інтэлектуальных правах.
- Пытанні аўтарскага права ў дзейнасці бібліятэк.
Кантактны тэлефон: (8 017) 293 27 28.
Карысныя спасылкі
Дакументы
- Аўтарскае права і сумежныя правы
- Сусветная канвенцыя аб аўтарскім праве
- Даклады Генеральнага сакратара ААН аб аўтарскім праве
- Дагавор САІУ па аўтарскім праве
- Электронная бібліятэка па аўтарскім праве
 |
 |
 |
