З 3 студзеня па 22 сакавіка ў зале нотных і аўдыядакументаў (пам. 305) ладзіцца выстаўка “Сінтэз музыкі, колеру і святла”, прысвечаная 140-годдзю з дня нараджэння кампазітара і піяніста А.М. Скрабіна (1872–1915).
Аляксандр Мікалаевіч Скрабін – адзін з найбуйнейшых рускіх кампазітараў канца XIX – пачатку ХХ стагоддзя, творчасць якога аказала велізарны ўплыў на развіццё сусветнай музычнай культуры.
Яго музыцы ўласцівыя эмацыянальная напружанасць, дыяпазон вобразаў ад адухоўлена-ідэальных, вытанчаных да экспрэсіўна-гераічных. Яркі наватар у галіне выразных сродкаў, А. Скрабін развіваў ідэю святламузыкі. Упершыню ў музычнай практыцы ім была ўведзена ў сімфанічную паэму “Праметэй” спецыяльная “партыя святла” (радок для пазначэння таго або іншага колеру на светлавой клавіятуры).
Да лепшых сачыненняў кампазітара адносяцца 3-я сімфонія “Боская паэма” (яна стала выдатным помнікам рускай і сусветнай сімфанічнай музыцы), “Паэма экстазу”, “Праметэй”, шматлікія фартэпіянныя творы розных жанраў (санаты, прэлюдыі, паэмы, эцюды, мазуркі), канцэрт для фартэпіяна з аркестрам.
Адной з апошніх задум А. Скрабіна стала няздзейсненая “Містэрыя”, якая павінна была ўвасобіцца ў грандыёзнае дзейства – сімфонію не толькі гукаў, але і фарбаў, водараў, рухаў, нават архітэктуры, якая гучыць.
На выстаўцы прадстаўлены нотныя выданні вышэйпералічаных твораў, а таксама кнігі і публікацыі пра кампазітара.
Кантактны тэлефон: 293-27-52.
 |
 |
 |
 |
 |
 |
 |
 |
 |
 |
 |
 |
