Да 90-годдзя з часу адкрыцця Нацыянальнага акадэмічнага тэатра імя Янкі Купалы ў Нацыянальнай бібліятэцы Беларусі ладзіцца святочная кніжна-ілюстрацыйная экспазіцыя "Сімвал беларускай тэатральнай культуры".
Ужо 90 гадоў урачыста падымае заслону адзін з вядучых тэатраў рэспублікі – Нацыянальны акадэмічны тэатр імя Янкі Купалы. Яго шырокая рэпертуарная палітра ўключае сучасныя п’есы, жанравыя пастаноўкі, рускую і замежную класіку.
Традыцыйнае рашэнне і сучасная форма. Пластычная метафара і бытавая даставернасць. Трагічнае ўзрушанне і сатырычны гратэск. Філасофская прытча і фальклорная абраднасць. Тужлівая меладрама і вясёлая камедыя. Дэтэктыў і чароўная дзіцячая казка... Спектаклі купалаўскага тэатра шматфарбныя, разнастайныя, яны запрашаюць гледача да сумеснага роздуму.
Пачыналася ж усё са знамянальнай даты – урачыстага адкрыцця Беларускага дзяржаўнага тэатра, якое адбылося 14 верасня 1920 г. У гэты дзень пад адным дахам Мінскага гарадскога тэатра ставілі спектаклі тры самастойныя трупы – беларуская, руская і яўрэйская. Аснову беларускай трупы склалі ўдзельнікі Першага таварыства беларускай драмы і камедыі на чале з Ф. Ждановічам. Яны паставілі спектакль “Рысь” паводле апавядання Э. Ажэшкі. З 1922 г. памяшканне тэатра замацавалася толькі за беларускай трупай. У 1944 г. тэатру было прысвоена імя Янкі Купалы.
Кніжна-ілюстрацыйная выстаўка, прысвечаная старэйшаму тэатру краіны, прапануе наведвальнікам і чытачам Нацыянальнай бібліятэкі Беларусі багатую экспазіцыю. Энцыклапедыі, фотанарысы і альбомы, гутаркі і інтэрв’ю са знакамітымі акцёрамі, ілюстрацыі і іншыя дакументы паведамяць пра розныя этапы ў гісторыі тэатра (раздзел “Купалаўскі тэатр: шляхі і ростані”), раскрыюць старонкі тэатральнага жыцця Беларусі, нагадаюць пра лепшых прадстаўнікоў розных пакаленняў купалаўцаў (раздзел “Дыялог праз рампу: тэатральныя партрэты”), раскажуць пра выдатныя пастаноўкі розных гадоў (раздзел “Бязмежная прастора купалаўскай сцэны”).
Раздзел “Творы, прачытаныя сцэнай” уключае зборнікі драматургіі беларускіх пісьменнікаў XIX–XX стагоддзяў, што добра вядомыя не толькі на Беларусі, але і за яе межамі (так званая “класіка жанру”), а таксама п’есы сучасных аўтараў, ужо пастаўленыя на купалаўскай сцэне.
Выстаўка размешчана на 3-м паверсе кальцавога калідора і будзе доўжыцца з 25 жніўня да 20 верасня.