Выстаўка прымеркавана да Дня Канcтытуцыі Рэспублікі Беларусь і шэрагу важных юбілеяў 2019 года. Сёлета спаўняецца 490 гадоў Першаму Статуту Вялікага Княства Літоўскага, 100 гадоў першай Канстытуцыі Савецкай Сацыялістычнай Рэспублікі Беларусі і 25 гадоў Канстытуцыі Рэспублікі Беларусь.
Выстаўка “Шлях да Канстытуцыі” адлюстроўвае асноўныя этапы, якія наша краіна прайшла ў развіцці і фарміраванні галоўнага закона дзяржавы і прадстаўляе гісторыю канстытуцыйных актаў Беларусі за апошнія 500 гадоў.
Экспазіцыя складаецца з унікальных рукапісных, старадрукаваных помнікаў права, а таксама выданняў XIX–XXІ стст. Значная частка выстаўкі прысвечана Статуту ВКЛ. Прадстаўлены факсіміле розных спісаў рукапіснага Статута 1529 г., экзэмпляры Статута 1588 г.: пераклад на польскую мову (Вільня, друкарня братоў Мамонічаў, 1619 г.), варшаўскае выданне каралеўскага друкара П. Элерта (1648 г.), віленскія перавыданні езуіцкай акадэміі (1744 г., 1786 г.), а таксама экзэмпляр у перакладзе на рускую мову (Санкт-Пецярбург, 1811 г.) і інш.
У экспазіцыі змешчаны знакавыя для беларускага права Канстытуцыі: першая еўрапейская Рэчы Паспалітай ад 3 мая 1791 г., першая савецкая (ССРБ) 1919 г., чатырохмоўная БССР 1927 г. і іншыя канстытуцыі савецкага перыяду. Пачэснае месца займае Канстытуцыя нашай незалежнай дзяржавы 1994 г. у першапачатковым выглядзе і з улікам пазнейшых змен і дапаўненняў.
Выстаўка будзе працаваць у музеі кнігі да 14 красавіка 2019 г. штодзень, акрамя панядзелка і дзяржаўных свят.
Дата яе завяршэння можа быць зменена.
Час работы выстаўкі адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Тэлефон для даведак і заказу экскурсій: (8 017) 293 27 22.
Матэрыял прадастаўлены навукова-даследчым аддзелам кнігазнаўства.
