З 3 жніўня па 7 верасня ў зале беларускай літаратуры (пам. 205) ладзіцца выстаўка “Шчыры голас Бацькаўшчыны”, прымеркаваная да 80-годдзя А. В. Мальдзіса.
Адам Восіпавіч Мальдзіс – беларускі літаратуразнавец, крытык, празаік, публіцыст, грамадскі дзеяч. Таленавіты вучоны з сусветным імем, энцыклапедыст, пісьменнік вядомы далёка за межамі Беларусі. У сваіх працах ён даследуе беларускую літаратуру XVII–XIX стст., заканамернасці яе станаўлення і гістарычнага развіцця, гісторыю беларускай культуры, беларуска-польскія, беларуска-літоўскія і беларуска-рускія літаратурныя ўзаемасувязі. Кнігі Адама Восіпавіча, багатыя на новыя факты, адшуканыя ў архівах і бібліятэках краіны і за мяжой, займальныя па форме выкладання, прыцягваюць вялікую ўвагу і цікавасць чытачоў і хутка становяцца рарытэтамі.
Цэнтральнае месца ў экспазіцыі займаюць манаграфіі аўтара “Творчае пабрацімства” (1966), “Падарожжа ў XIX стагоддзе” (1969), “Таямніцы старажытных сховішчаў” (1974), краязнаўчы нарыс “Астравеччына, край дарагі…” (1977), “На скрыжаванні славянскіх традыцый” (1980), “Беларусь у люстэрку мемуарнай літаратуры XVIII стагоддзя” (1982), гістарычная аповесць “Восень пасярод вясны” (1984), “З літаратуразнаўчых вандраванняў” (1987), “І ажываюць спадчыны старонкі: выбранае” (1994), літаратурны партрэт “Жыццё і ўзнясенне Уладзіміра Караткевіча” (1990, 2010), “Выбранае” (2007), кніга “Як жылі нашы продкі ў XVIII стагоддзі” (2001), “Белорусские сокровища за рубежом” (2009).
Выстаўка знаёміць наведвальнікаў з кнігамі, у выданні якіх Адам Мальдзіс удзельнічаў у якасці суаўтара. Гэта такія працы, як “Шляхі вялі праз Беларусь” (1980), “Перазовы сяброўскіх галасоў” (1988), “Літаратурныя мясціны Беларусі” (2000), “Даўняя Беларусь: з настальгіяй аб мінулым” (2010) і інш.
Асобна экспануюцца на выстаўцы выдадзеныя пад рэдакцыяй вучонага біябібліяграфічны слоўнік “Беларускія пісьменнікі”, серыйныя зборнікі “Беларусіка = Albaruthenica”, “Вяртанне” і іншыя працы, а таксама шматлікія навуковыя і публіцыстычныя артыкулы, прадмовы і рэцэнзіі аўтара.
Завяршаюць экспазіцыю матэрыялы пра жыццё і творчасць юбіляра.
Кантактны тэлефон: (8 017) 293 27 16.