З 17 па 28 лютага ў зале беларускай літаратуры (пам. 205) праходзіць кніжная выстаўка “Шчырая песня паэта”, прысвечаная 90-годдзю з дня нараджэння Пятра Фёдаравіча Прыходзькі.
Пятро Прыходзька – беларускі паэт, перакладчык, лаўрэат Літаратурнай прэміі імя А. Куляшова (1985 г.).
Ён прыйшоў у беларускую літаратуру паэтам-воінам, якога лёс правёў франтавымі дарогамі праз усю Вялікую Айчынную вайну. Незабыўныя падзеі той ваеннай пары рэхам адгукаюцца амаль ва ўсіх яго кнігах.
На выстаўцы шырока прадстаўлена літаратурная спадчына паэта, якую складаюць зборнікі паэзіі “Голас сэрца” (1947), “Ранак над Эльбай” (1952), “Плацдарм” (1978), “Лісты з паходаў” (1980), “Парог памяці” (1983), “Апаленыя вёрсты” (1986), “Споведзь любові” (1990), “Позняя восень” (2001), “Любоў без ростані” (2005) і інш. У экспазіцыі – кніга-дзённік “Па слядах маланкі” (1991), успаміны “На хвалях часу” (2005), кніжкі, адрасаваныя дзецям, “Сустрэча з маленствам” (1967), “Каляка-маляка” (1981), “Бярозавы лісток” (2004), а таксама вялікая колькасць паэтычных твораў, надрукаваных у зборніках і перыядычных выданнях.
Асобныя раздзелы выстаўкі прысвечаны перакладчыцкай дзейнасці Пятра Прыходзькі і перакладам твораў пісьменніка на іншыя мовы.
Матэрыялы, прадстаўленыя ў апошнім раздзеле “Дарогамі жыцця”, знаёмяць са звесткамі пра жыццёвы і творчы шлях паэта.
Кантактны тэлефон: 293-27-16.
 |
 |
 |
