З 15 студзеня па 10 лютага ў зале нотных і аўдыявізуальных дакументаў (пам. 305) праходзіць выстаўка “Шчодрасць музычнай палітры”, прысвечаная 75-годдзю з дня нараджэння Валерыя Іванавіча Карэтнікава.
Беларускі кампазітар і педагог Валерый Карэтнікаў з’яўляецца пераемнікам лепшых традыцый кампазітарскай школы Беларусі. Яго музыка вылучаецца яркай выразнасцю, тонкім псіхалагічным настроем, мастацкім абрысам вобразаў, перадае разнастайны свет чалавечых пачуццяў і эмоцый. Ёй уласцівыя гарманічная мастацкасць, кампактнасць і лаканізм формы. Кампазітар працуе ў розных жанрах акадэмічнай музыкі. Сярод сачыненняў аўтара – кантата “Памяць” (1969), вакальна-інструментальная паэма “Флейтыст” (1996), балет “Дзюймовачка” (2009), сімфоніі (1970, 1992), канцэрты для фартэпіяна з аркестрам (1986, 1993), сюіта “Поры года” (2002), п’есы для фартэпіяна, санаты, паэма для альта і фартэпіяна, скерца для скрыпкі і фартэпіяна, квінтэт для флейты і струннага квартэта і інш.
На выстаўцы прадстаўлены нотныя выданні і аўдыядакументы твораў В. Карэтнікава. Дэманструюцца копіі рукапісных п’ес для фартэпіяна “Насланне”, “Ноч у лесе” і “Сонечны зайчык”. У ліку экспанатаў – хрэстаматыя “Белорусская музыка второй половины XX века” (2006), якая стала грунтоўнай працай кампазітара ў якасці ўкладальніка і музычнага рэдактара.
Значную частку экспазіцыі склалі даведачныя выданні і публікацыі, якія адлюстроўваюць асноўныя этапы жыцця і творчай дзейнасці юбіляра.
Кантактны тэлефон: (8 017) 293 27 52.
 |
 |
 |
 |
 |
 |
